Ўзбекистон Адлия вазирлиги томонидан 6 январь куни бош ташкилоти АҚШда жойлашган Винрок халқаро қишлоқ хўжалигини ривожлантириш институтининг Ўзбекистондаги филиали давлат рўйхатидан ўтказилди. Бу ҳақда идора матбуот хизмати хабар берди.
«Филиалнинг асосий мақсад ва вазифалари – овқатланиш ва ижтимоий-иқтисодий фаровонликни яхшилашга, тола ва ёқилғи, шу жумладан, чорвачилик, озиқ-овқат ва ноозиқ-овқат маҳсулотларини ишлаб чиқариш, тарқатиш ҳамда табиий ресурсларни бошқаришни такомиллаштиришга кўмаклашишдир», — дейилади хабарда.
Шунингдек, филиал АҚШ Халқаро ривожланиш агентлиги (USAID) томонидан молиялаштириладиган «Марказий Осиёда хавфсиз миграция» (SMICA, 2019—2024) лойиҳасини амалга оширишга кўмаклашади. Ўзбекистонда одам савдосининг олдини олиш, омон қолган жабрланувчиларни ҳимоя қилиш, хавфсиз миграцияга кўмаклашиш, хавф остида бўлган аҳоли қатламининг одам савдосининг барча шаклларига нисбатан заифлигини камайтиришга ҳамда одам савдоси жабрланувчиларига ёрдам бериш ва аниқлаш усулларини ривожлантиришга кўмаклашишга қаратилган ушбу лойиҳа бюджети 2,34 миллион АҚШ долларини ташкил этади.
Winrock сайтининг маълумотларига кўра, ташкилот дунёнинг 46 та давлатида қишлоқ хўжалиги, атроф-муҳит ва ижтимоий ривожланиш соҳалари бўйича 140 дан ортиқ лойиҳаларни амалга ошириб келади.
«Коммерсантъ»нинг ёзишича, ташкилот бунга қадар ҳам Ўзбекистонда фаолият кўрсатган. 2006 йилда Тошкент судининг қарори билан унинг ваколатхонаси «ваколатхона фаолиятининг белгиланган устувор вазифаларга мос келмаслиги» бўйича ёпилган эди.
Изоҳ (0)