Bag‘dod sudi Eron generali Qosim Sulaymoniy o‘ldirilishi bo‘yicha tergov doirasida AQShning amaldagi prezidenti Donald Trampni hibsga olishga order berdi, deb xabar bermoqda Associated Press.
Ta’kidlanishicha, Sulaymoniy va u bilan birga vafot etgan Iroq xalq safarbarlik kuchlari qo‘mondoni o‘rinbosari Abu Mahdi al-Muhandisning o‘ldirilishi oldindan rejalashtirilgan deb hisoblanadi. Iroq qonunchiligiga ko‘ra, qasddan odam o‘ldirishda aybdor deb topilganlar o‘lim jazosiga hukm qilinadi.
Associated Press qayd etishicha, Tramp prezidentligining so‘nggi kunlarida e’lon qilingan Iroq sudining qarori ramziy ma’noga ega.
Eslatib o‘tamiz, Eron Islom inqilobi muhofizlari korpusi (IIMK) generali Qosim Sulaymoniy va Iroq xalq safarbarlik kuchlari qo‘mondoni o‘rinbosari Abu Mahdi al-Muhandis 2020-yil 3-yanvar kuni AQSh havo kuchlari tomonidan Bag‘dod aeroportiga berilgan aviahujum oqibatida o‘ldirilgandi. Zarba AQSh prezidenti Donald Tramp farmoyishiga asosan berilgan.
Bunga javoban Eron Iroqdagi Amerika bazasiga hujum qilgan. Buning oqibatida 100 dan ortiq amerikalik jarohatlangandi.
Izoh (0)