Jahon sog‘liqni saqlash tashkiloti (JSST) xalqaro ekspertlariga Xitoyda koronavirusning kelib chiqishini tadqiq qilish uchun ruxsat berilmadi. Bu haqda JSST rahbari Tedros Adanom Gebreyesus ma’lum qildi, deyiladi tashkilot xabarida.
JSST rahbari Xitoy hukumatini ekspertlarning Xitoyga kelishi uchun zarur ruxsatnomalarni rasmiylashtirmaganlikda aybladi. “Jamoaning ikki a’zosi o‘z safarini allaqachon boshlagani, boshqalari esa Xitoyga so‘nggi daqiqada jo‘nab keta olmaganini hisobga olib, men bu yangilikdan juda hafsalam pir bo‘ldi”, — dedi u.
Gebreyesusning aytishicha, muammoni allaqachon Xitoy hukumati bilan muhokama qilgan va ular tomonidan Pekin zarur ruxsatnomalarni berish jarayonini tezlashtirishiga ishontirilgan. “Tadqiqot iloji boricha tezroq boshlanishini xohlaymiz”, — deya qo‘shib qo‘ydi u.
Yangi turdagi koronavirus keltirib chiqargan COVID-19 pnevmoniyasi birinchi marta 2019-yil oxirida Xitoyning Uxan shahrida qayd etilgan edi. 2020-yil 11-martda JSST vaziyatni pandemiya deb atash mumkinligini ma’lum qildi. 2021-yil 6-yanvariga kelib, koronavirusga chalinish holatlari dunyoda 86 milliondan oshdi.
Avvalroq AQSh prezidentining milliy xavfsizlik masalalari bo‘yicha maslahatchisi o‘rinbosari Mettyu Pottinger koronavirus infeksiyasi katta ehtimol bilan Xitoyning Uxan shahridagi laboratoriyadan sizib chiqqani — kasallik manbasi haqidagi taxminlar orasida eng ishonchga sazovori shu ekanini aytgan edi.
AQSh prezidenti Donald Tramp 2020-yil may oyi boshida bergan bayonotida Xitoy rasmiylarini kasallik tarqalishining boshlang‘ich davrida koronavirusga doir ma’lumotlarni yashirishda ayblagan edi. O‘shanda Amerika yetakchisi virus Uxandagi laboratoriyada sun’iy yaratilganini tasdiqlovchi dalillari borligi haqida gapirgan edi.
Biroq AQSh Davlat departamentining Razvedka va tadqiqotlar byurosi dalillar yo‘qligi uchun bu versiyani tasdiqlamagan. Xitoy esa Trampning ayblovlariga javoban koronavirus laboratoriyada o‘ylab topilganini rad etuvchi JSST xulosalarini ko‘rsatib o‘tgan edi.
Mavzuga doir:
Izoh (0)