Navoiy viloyati Tomdi tumanida Matiz tezligini oshirishi natijasida yo‘ldan chiqib ketib ag‘darilib ketgan, deya xabar bermoqda viloyat hokimligi axborot xizmati.
Ma’lum qilinishicha, 2021-yilning 3-yanvar kuni soat 15:35 larda Tomdi tumani hududidan o‘tuvchi 4R–57 davlat ahamiyatiga ega avtomobil yo‘lining 361-kilometrida 1991-yilda tug‘ilgan haydovchi M.O. Matiz rusumli avtomashinasini Utamurot–Tomdi yo‘nalishida harakatlanib kelayotgan vaqtida tezlikni me’yoridan oshirgan.
Natijada avtomashina o‘z harakat yo‘nalishiga nisbatan yo‘lning o‘ng tomon cho‘l hududiga chiqib ketib ag‘darilib, yo‘l-transport hodisasi sodir etgan.
Oqibatda haydovchi bosh miya yopiq jarohati, bosh miya chayqalishi tan jarohatlari olib, Tomdi tumani tibbiyot birlashmasiga yotqizilgan. Avtomashinada yo‘lovchi sifatida ketayotgan 1991-yilda tug‘ilgan S.K. esa olgan og‘ir tan jarohatlari natijasida voqea joyida vafot etgan.
Mazkur holat yuzasidan Tomdi tuman IIB tomonidan fuqaro M.O.ga nisbatan Jinoyat kodeksining 266-moddasi 2-qismi (odam o‘limiga sabab bo‘lgan transport vositasini boshqarish qoidalarini buzish) bilan jinoyat ishi qo‘zg‘atilib, dastlabki tergov-surishturuv ishlari olib borilmoqda.
Avvalroq Qamchiq dovonida suv xo‘jaligi vazirining o‘rinbosariga tegishli Gentra jarlikka qulagani, Oqqo‘rg‘onda haydovchisi boshqaruvni yo‘qotgan Nexia hamda Toshkentda BMW X5 haydovchisi boshqaruvni yo‘qotishi oqibatida avtomobil ag‘darilib ketgani haqida xabar berilgandi.
Izoh (0)