Ijtimoiy tarmoqda 2020-yilning 2-dekabr kuni “Qashqadaryoda bodikamerasiz GAI xodimi” sarlavhasi ostidagi videolavha tarqaldi. Holat yuzasidan YHXBB ma’lumot berdi.
Ta’kidlanishicha, 2020-yilning 2-dekabr kuni Qashqadaryo viloyati Shahrisabz shahrida sohaviy xizmatlar bilan hamkorlikda jamoat tartibini saqlash, huquqbuzarliklarga qarshi kurashish profilaktik tadbiri davomida qarzdorligi o‘z vaqtida to‘lanmagan haydovchilar aniqlanishi bo‘yicha ish tashkil etilgan.
Viloyat IIB YHXB xodimi G‘iyos Fayziyev ham ushbu tadbirga jalb etilib, xizmatni bodikamerasiz olib borgan holati fuqaro M.M. tomonidan olingan video lavhada aks etgan.
Mazkur holat yuzasidan Qashqadaryo viloyati IIB YHXB tomonidan xizmat tekshiruvi o‘tkazilgan.
Tekshiruv natijasida xizmat faoliyati davomida Vazirlar Mahkamasining 2018-yil 1-dekabrdagi 975-son qarori bilan tasdiqlangan “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi nizom talablarini buzgani uchun Qashqadaryo viloyati IIB YHXB YPXB xodimi G‘iyos Fayziyevga “tanbeh” intizomiy jazosi e’lon qilingan.
Avvalroq Toshkentda YPX xodimini mashinasi kapotida sudrab ketgan haydovchiga nisbatan chora ko‘rilgani, Qatortolda kaltak yegan PPX xodimi fuqaroga qarshi o‘qotar qurol ishlatmoqchi bo‘lgani hamda Toshkentda mast holda jamoat tartibini buzgan ichki ishlar organi xodimi lavozimidan ozod etilgani haqida xabar berilgandi.
Izoh (0)