Навоий вилояти Томди туманида Matiz тезлигини ошириши натижасида йўлдан чиқиб кетиб ағдарилиб кетган, дея хабар бермоқда вилоят ҳокимлиги ахборот хизмати.
Маълум қилинишича, 2021 йилнинг 3 январь куни соат 15:35 ларда Томди тумани ҳудудидан ўтувчи 4Р–57 давлат аҳамиятига эга автомобиль йўлининг 361-километрида 1991 йилда туғилган ҳайдовчи М.О. Matiz русумли автомашинасини Утамурот–Томди йўналишида ҳаракатланиб келаётган вақтида тезликни меъёридан оширган.
Натижада автомашина ўз ҳаракат йўналишига нисбатан йўлнинг ўнг томон чўл ҳудудига чиқиб кетиб ағдарилиб, йўл-транспорт ҳодисаси содир этган.
Оқибатда ҳайдовчи бош мия ёпиқ жароҳати, бош мия чайқалиши тан жароҳатлари олиб, Томди тумани тиббиёт бирлашмасига ётқизилган. Автомашинада йўловчи сифатида кетаётган 1991 йилда туғилган С.К. эса олган оғир тан жароҳатлари натижасида воқеа жойида вафот этган.
Мазкур ҳолат юзасидан Томди туман ИИБ томонидан фуқаро М.О.га нисбатан Жиноят кодексининг 266-моддаси 2-қисми (одам ўлимига сабаб бўлган транспорт воситасини бошқариш қоидаларини бузиш) билан жиноят иши қўзғатилиб, дастлабки тергов-суриштурув ишлари олиб борилмоқда.
Аввалроқ Қамчиқ довонида сув хўжалиги вазирининг ўринбосарига тегишли Gentra жарликка қулагани, Оққўрғонда ҳайдовчиси бошқарувни йўқотган Nexia ҳамда Тошкентда BMW X5 ҳайдовчиси бошқарувни йўқотиши оқибатида автомобиль ағдарилиб кетгани ҳақида хабар берилганди.
Изоҳ (0)