Navalniyni zaharlaganlarning boshqa faollar va siyosatchilar o‘limiga ham ehtimoliy aloqadorligini jurnalistlar tekshirmoqda

Bellingcat jurnalistik tadqiqot sayti siyosatchi Aleksey Navalniyni zaharlagan deb taxmin etilayotgan Rossiya Federal xavfsizlik xizmati (FXX) xodimlarining jurnalist Timur Kuashev va siyosatchi Nikita Isayevning o‘limlariga, shuningdek, siyosatchi kichik Vladimir Kara-Murzaning zaharlanishiga ehtimoliy aloqadorligi yuzasidan tekshiruv olib bormoqda, deb yozadi Meduza. Buni Bellingcat jurnalisti Xristo Grozev tasdiqlagan.

“Ularning barchasida muayyan elementlar mos tushadi, bular esa qo‘shimcha tekshiruvni talab etadi. Lekin men hozircha hech qanaqa ismlarni aytmoqchi emasman. Ayniqsa marhumlarning ismlarini, chunki agar biz bu FXX guruhi bilan bog‘liq bo‘lishi mumkin, desak, ularning oilalari uchun bu mash’um kunga aylanishi mumkin. Shunday ekan, 100 foiz dalil-isbotga ega bo‘lmasdan turib, bunday deyishga tayyor emasman. Ammo bu o‘xshashliklarni biz juda batafsil qilib o‘rganamiz”, — dedi Grozev.

Uning so‘zlariga ko‘ra, bir guruh ehtimoliy FXX xodimlari Shimoliy Kavkazdagi operatsiyada ishtirok etgani, uning doirasida mahalliy siyosatchilar va jurnalistlarni o‘ldirganligini taxmin qilish imkonini beruvchi dalillar allaqachon bor.

“Shuni aytmoqchimanki, bizda muayyan bir chegarani topish imkonini beruvchi algoritm bor, ana shu chiziqdan o‘tgan holatni shunchaki tasodif deb aytib bo‘lmaydi. Ammo bu algoritm safarlarga asoslangan, u kamida uchta shunday safarni talab etadi. Siz aytgan odamlarning ba’zilarida (Kuashev, Isayev, Kara-Murza) allaqachon uchtadan safar bor”, — dedi Grozev.

Xristo Grozev — Bellingcat The Insider, CNN va Der Spiegel bilan birgalikda olib borgan Navalniyning zaharlanishi haqidagi tadqiqotning asosiy muallifi. Tadqiqotchilar Navalniyni FXX tezkor xodimlari guruhi “Novichok” bilan zaharlagan, degan xulosaga keldi. Ularning shaxslarini tadqiqot mualliflari aviayo‘lovchilar ma’lumotlar bazasi tahlili va uyali telefonlar billingi yordamida aniqladi.

31-dekabr kuni FXX xodimlari deb taxmin etilayotgan o‘n kishining 500 dan ortiq safarlari haqidagi axborot e’lon qilindi, ularning sakkiz nafari Navalniyning zaharlanishi haqidagi tadqiqotda tilga olingan edi.

1-yanvar kuni Grozev FXX guruhining ehtimoliy ishtirokchilarining u yoqdan bu yoqqa o‘tib yurishlari haqidagi ma’lumot ularning yana uchta zaharlanish va ikkita suiqasdga aloqador bo‘lishi mumkin deb taxmin qilish uchun asos bo‘lishini aytdi. Grozev boshqa tafsilotlarni keltirmadi.

Grozev tomonidan e’lon qilingan safarlar ro‘yxatida jurnalist Timur Kuashev, shuningdek, “Sadval” lezgin xalq harakati yetakchisi Ruslan Magomedrahimov va chechen ayirmachilari yetakchisi Doku Umarovning o‘limi vaqti va joyi bilan bog‘liq o‘xshashliklarni topdi.