Tojikistonning ko‘p qavatli binolari bo‘lmagan qishloq joylariga elektr energiyasi ta’minotida 5-yanvardan cheklov joriy qilindi. Aholi uylarida soat 23:00 dan 06:00 gacha “svet” bo‘lmaydi, deb xabar bermoqda Asia-Plus.
Nashrning hukumatdagi manbasi Nurek GES suv omboridagi suv sathi 2020-yilning shu davriga nisbatan 4 metrga past bo‘lganligi sababli shunday qaror qabul qilinganini ma’lum qilgan.
Ushbu cheklov qachongacha amal qilishi noma’lum. Manba, shuningdek, Tojikiston qo‘shni mamlakatlarga elektr energiyasi eksport qilmayotganini bildirgan.
Qayd etilishicha, kuzda mamlakatning qishloq va viloyatlari aholisi elektr energiyasi tez-tez va uzoq vaqt uzilishlardan shikoyat qilgan: ularga sutkasiga 4—6 soat elektr energiyasi berilgan.
10-dekabrdan boshlab Tojikistonning barcha qishloq, tuman, shaharlari bir necha soatlik uzilishlar bo‘lgan alohida holatlarni hisobga olmaganda, uzluksiz va tun-u kun elektr energiyasi bilan ta’minlangan.
Biroq ekspertlarning ma’lum qilishicha, Tojikistonning suv-energetika resurslari bahor—yoz mavsumiga qadar ushlab turish uchun yetarli emas va cheklovlar joriy etilishi ehtimoli mavjud.
Agar Nurek GES suv omborini suv bilan to‘ldirish bilan bog‘liq vaziyat yomonlashishda davom etsa, shahar ma’muriyati 5-yanvardan joriy etilgan cheklov butun mamlakat bo‘ylab, hattoki Dushanbegacha kuchaytirilishini kutish mumkinligini qayd etgan.
5-yanvar kuni Markaziy Osiyo va Qozog‘istonni bog‘laydigan yagona energiya tizimining elektr uzatish tarmoqlarida rejadan tashqari uzilishlar yuz berdi. Shu sababli O‘zbekistondagi issiqlik elektr stansiyalarida avariyaga qarshi avtomatika ishga tushib ketgan. Mamlakat Energetika vazirligi elektr energiyasida qisqa muddatli uzilishlar bo‘lishi haqida ogohlantirdi.
Izoh (0)