АҚШнинг Висконсин штатида коронавирусга қарши вакцина партиясини қасддан яроқсиз ҳолга келтирган фармацевт ҳибсга олингани ҳақида хабар берилганди. Business Insider’нинг суд материалларига таяниб маълум қилишича, 44 ёшли ушбу фармацевт Стивен Бранденбург вакцина одамларга зиён етказиши ва уларнинг ДНКсини ўзгартиришига ишонган.
Воқеа Висконсин штатида содир бўлган. Aurora Health Care тиббиёт муассасаси тармоғининг собиқ ходими тахминан 500 доза Moderna вакцинасини музлатгичдан чиқариб, кейинчалик самарасиз бўлиб қолишини билган ҳолда уни қасддан сақлаш хонаси ташқарисида қолдирган.
Дастлаб у вакцинани бошқа препаратларни олаётганда тасодифан музлатгич ташқарисида қолдирганини айтган. Кейинчалик препаратни қасддан бузгани ва бундан олдин ҳам бир неча бор шундай қилганини тан олган.
Полиция унга нисбатан қасддан мулкка зарар етказиш, моддий зарар етказиш ва фуқароларнинг соғлиғига хавф туғдирадиган бошқа ҳаракатлар содир этганлик айбловини қўйган. Дастлабки маълумотларга кўра, собиқ фармацевт ўз ҳаракати билан 8 мингдан 11 минг долларгача моддий зарар етказган. Гаров миқдори 10 минг доллар миқдорида белгиланган.
Аввалроқ, декабрь ойи бошида Нью-Йорк штати полицияси асосан яҳудий диаспорасига хизмат кўрсатадиган маҳаллий клиникалар тармоғида текширув бошлаганди. Тиббиёт муассасалари раҳбарияти вакцинадан ноқонуний фойдаланиш, уни жисмоний шахсларга тарқатиш ва ваколатли органлар томонидан тасдиқланган вакцинация режасини бузганликда гумон қилинган.
Аввалроқ АҚШда COVID-19’га қарши вакцина олишдаги фирибгарликлар бўйича текширув бошлангани, бундай фирибгарликлар учун 1 миллион доллар жарима солиниши ҳақида хабар берилганди.
Изоҳ (0)