Ўзбекистон соғлиқни сақлаш тизимидаги коррупцион ҳолатларни ўрганишни тиббиёт муассасаларини лицензиялашга масъул бўғиндан бошлаш керак, дейди «Medinvest» корхонаси раҳбари Саидикром Аҳроров «Дарё» мухбири Мусулмонбек Иброҳимовга берган интервьюсида.
Унинг таъкидлашича, сўнгги йилларда «анча жонланиб қолган» хусусий тиббиёт соҳасида яхши ишлаётганлар ҳам бор, «ёмон йўлдан кетганлари» ҳам бор. Хусусан, 2018 йили Самарқанддаги хусусий касалхона ноқонуний туғруқларни амалга ошириш билан шуғулланиб, бола савдосига аралашгани, сотилмаган чақалоқларни ҳатто ёқиб юборгани маълум бўлганини эслаб ўтди.
«Бир неча йил аввал Самарқандда хусусий туғруқхона шифокорларига нисбатан жиноят иши очилган эди. Шу ҳолат юзасидан Соғлиқни сақлаш вазирлигининг лицензия бошқармаси бошлиғи шундай баёнот билан чиқди: Биз бу туғруқхонани ўн марта ёпганмиз, лекин у яна ўн марта қайтадан очилди. Савол туғилади — ким очди, ким рухсат берди?», — дейди Аҳроров. Унинг таъкидлашича, бошқа бир хусусий клиникада бир ой ичида учта ўлим қайд этилган. Текширилса, клиниканинг ҳужжатлари қалбаки, на директори ва на бош шифокорида тиббий билим бор.
«2020 йил бошида бош прокурор ўтказган йиғилишда соғлиқни сақлаш тизимидаги камчиликлар, хусусан, коррупцион ҳолатлар борлиги айтилди. Эртасига Соғлиқни сақлаш вазирлиги 2020 йил вазирлик учун коррупцияга қарши кураш йили бўлади, деб эълон қилди. Шу баёнотдан кейин вазирлик бир иш қилдими? Фикримча, бу соҳадаги коррупцияга қарши курашни лицензия бошқармасидан бошлаш керак. Лицензия кимларга, қандай қилиб бериляпти, шу саволларга жавоб топиш лозим», — дея қўшимча қилди Саидикром Аҳроров.
Маълумот учун, муҳандис-технолог Саидикром Аҳроров 1985—2003 йилларда Ўзбекистонда тиббиёт буюмлари билан таъминлаш ишларига раҳбарлик қилган. 2003—2017 йилларда Испания ва БААда фаолият юритган. У ҳозирда раҳбарлик қилаётган «Medinvest» корхонаси тиббиёт буюмлари ишлаб чиқаришга ихтисослашган.
Изоҳ (0)