АҚШда коронавирус билан боғлиқ вазиятга доир маълумотлар ҳаддан ташқари бўрттирилган, бунга касалланганлар ва вафот этганлар сонини ҳисоблаш бўйича Касалликларнинг олдини олиш ва назорат қилиш маркази (CДC) қўллаётган усул сабабчи, деди АҚШ президенти Дональд Трамп. У бу ҳақда Twitter’даги саҳифасида ёзиб қолдирган.
«АҚШда Хитой вируси билан касалланиш ҳолатлари сони бошқа, аксарияти касалланиш ҳолатлари миқдорини қасддан камайтириб кўрсатадиган ёки ноаниқ маълумот берадиган давлатларники билан ҳам таққослаганда кулгили бўлган усул сабаб ҳаддан ташқари бўрттирилган. ‘Агар қандайдир шубҳангиз бўлса, унда буни COVID деб атайверинғ. Фейк хабарлар!», — деб ёзган президент.
CДC маълумотларига кўра, АҚШда пандемия бошидан бери COVID-19 ни юқтириб олиш билан боғлиқ 20 миллионта ҳолат қайд этилган, шундан 346,9 минг киши вафот этган. Айни вақтда, Жонс Ҳопкинс университети маълумотларига кўра, мамлакатда касалланганлар сони 20,4 миллионга етган, 350,2 минг киши вафот этган.
АҚШнинг бош инфекционисти Энтони Фаучи Трампнинг сўзларига муносабат билдириб, касалланиш ҳолатлари ва ўлимлар сони ҳаққоний эканини таъкидлаган. «Касалхоналарга боринг. Тиббиёт ходимлари қандай балога тўқнаш келганини кўринг. Бу ҳақиқат. Фейк эмас», — деди Фаучи.
Касалликларнинг олдини олиш ва назорат қилиш маркази томонидан октябрь ойида эълон қилинган мақолада коронавирус оқибатидаги ўлим ҳолатлари сони аслида расмий статистикадагидан кўпроқ бўлиши мумкинлиги таъкидланган эди. Бунда гап коронавирусни симптомсиз кечирган ёки пандемия билан боғлиқ бошқа сабаблар оқибатида вафот этганлар ҳақида бормоқда.
АҚШда айни вақтда аҳолини коронавирусга қарши эмлаш (вакцинация) кампанияси давом этмоқда. 4 миллиондан ортиқ америкалик Moderna ёки Pfizer/BioNTech компанияларининг вакцинаси билан эмланган. Мамлакатдаги эмлаш шохобчаларига жами 13 миллион доза дори тарқатилган.
Изоҳ (0)