2021-yil 1-fevraldan boshlab eng kam ish haqi miqdorining oshishiga qaramay oliy ta’lim muassasalarida to‘lov-kontrakt miqdorlari o‘zgarmaydi. Bu haqda AOKAda o‘tkazilgan matbuot anjumanida Oliy va o‘rta maxsus ta’lim vazirligi axborot xizmati rahbari Farhod Babashev ma’lum qildi.
Avvalroq O‘zbekistonda 1-fevraldan oyliklar, ijtimoiy nafaqalar va stipendiyalar oshishi to‘g‘risida xabar berilgandi. Xususan, 1-fevraldan mehnatga haq to‘lashning eng kam miqdori oyiga 747,3 ming so‘m (679,3 ming so‘m) etib belgilandi. Bazaviy hisoblash miqdori esa 223 ming so‘mdan 245 ming so‘mga ko‘tariladi. Prezident qaroridan kelib chiqib, OTM talabalarining to‘lov-kontraktlari ham 10 foizga oshishi kerak edi.
Biroq pandemiya sharoiti hisobga olinib, talabalarning kontrakt miqdori oshirilmaydigan bo‘ldi.
“Pandemiya sharoitida respublika aholisining to‘lov qobiliyati pasayganligini hisobga olib, farzandi davlat oliy ta’lim muassasalarida to‘lov-kontrakt asosida o‘qiyotgan oilalarga yengillik yaratish va ularni ijtimoiy qo‘llab-quvvatlash maqsadida joriy o‘quv yilidagi amaldagi to‘lov-kontrakt miqdorlari o‘zgarishsiz saqlab qolinadi”, — deydi Farhod Babashev.
Eslatib o‘tamiz, 2020-yil 1-fevraldan mehnatga haq to‘lashning eng kam miqdori hamda pensiya, stipendiya va nafaqalar o‘rtacha 7 foizga, 1-sentabrdan boshlab pensiya va nafaqalar 10 foizga oshirilgan edi.
Izoh (0)