IIV YHXBB ijtimoiy tarmoqda “Aytishlaricha, samosud qilinayotgan fuqaro yo‘ldagi qoidabuzar haydovchilarni suratga olib, GAIga jo‘natgan” sarlavhasi ostida tarqalgan video yuzasidan ma’lumot berdi.
Idoraning Andijon viloyati IIB axborot xizmatiga tayanib ma’lum qilishicha, 2020-yilning 22-dekabr kuni soat 11:00 larda Andijon shahrida yashovchi N.Q. ismli fuqaro Jalaquduq tumani markazida joylashgan dehqon bozoriga mevalar narx-navosini bilish uchun kelib, bozorni fotosuratga olayotgan vaqtida bir necha fuqaro uni boshqa maqsadda suratga olayotganlikda gumonlab, jamoat joyida turli uyatli so‘zlar bilan haqorat qilgan.
Ta’kidlanishicha, holat yuzasidan Jalaquduq tumani IIB XPB IIO TP profilaktika katta inspektori tomonidan tergovga qadar tekshiruv harakatlari o‘tkazilgan.
Jumladan, besh nafar fuqaro jamoat joyida turli haqoratli so‘zlar bilan baqir-chaqir qilganligi uchun ularning harakatlarida Ma’muriy javobgarlik to‘g‘risidagi kodeksning 183-moddasida (mayda bezorilik) ko‘rsatib o‘tilgan huquqbuzarlik alomatlari mavjudligi bois to‘plangan hujjatlar chora ko‘rishlik uchun Jalaquduq tuman Ma’muriy sudiga yuborilgan.
25-dekabr kuni ma’muriy ish sudda ko‘rib chiqilib, huquqbuzarlarning har biriga BHMning 3 baravari miqdorida jarima jazosi belgilangan.
Ma’lumot uchun, hozirda YHXBBning “Dyhxx.ejarima.uz” maxsus sayti faqat videoregistratorlardagi yozuvlarni qabul qilmoqda. Shu bilan birga, qoidabuzarlik sodir etilganiga uch kundan va videoning davomiyligi 120 soniyadan oshmasligi kerak. Shuningdek, ularda sodir etilgan qoidabuzarlikning sanasi va vaqti ko‘rsatilgan bo‘lishi lozim.
Eslatib o‘tamiz, sodir etilgan har bir yo‘l harakati qoidasining buzilishi borasidagi yuborilgan videoyozuv uchun BHMning 5 foizi miqdorida mukofot puli beriladi. Sayt statistikasiga ko‘ra, bugunga qadar 12,5 ming foydalanuvchi 160 mingga yaqin qoidabuzarlik haqida xabar bergan.
Izoh (0)