2021 йил 1 февралдан бошлаб энг кам иш ҳақи миқдорининг ошишига қарамай олий таълим муассасаларида тўлов-контракт миқдорлари ўзгармайди. Бу ҳақда АОКАда ўтказилган матбуот анжуманида Олий ва ўрта махсус таълим вазирлиги ахборот хизмати раҳбари Фарҳод Бабашев маълум қилди.
Аввалроқ Ўзбекистонда 1 февралдан ойликлар, ижтимоий нафақалар ва стипендиялар ошиши тўғрисида хабар берилганди. Хусусан, 1 февралдан меҳнатга ҳақ тўлашнинг энг кам миқдори ойига 747,3 минг сўм (679,3 минг сўм) этиб белгиланди. Базавий ҳисоблаш миқдори эса 223 минг сўмдан 245 минг сўмга кўтарилади. Президент қароридан келиб чиқиб, ОТМ талабаларининг тўлов-контрактлари ҳам 10 фоизга ошиши керак эди.
Бироқ пандемия шароити ҳисобга олиниб, талабаларнинг контракт миқдори оширилмайдиган бўлди.
«Пандемия шароитида республика аҳолисининг тўлов қобилияти пасайганлигини ҳисобга олиб, фарзанди давлат олий таълим муассасаларида тўлов-контракт асосида ўқиётган оилаларга енгиллик яратиш ва уларни ижтимоий қўллаб-қувватлаш мақсадида жорий ўқув йилидаги амалдаги тўлов-контракт миқдорлари ўзгаришсиз сақлаб қолинади», — дейди Фарҳод Бабашев.
Эслатиб ўтамиз, 2020 йил 1 февралдан меҳнатга ҳақ тўлашнинг энг кам миқдори ҳамда пенсия, стипендия ва нафақалар ўртача 7 фоизга, 1 сентябрдан бошлаб пенсия ва нафақалар 10 фоизга оширилган эди.
Изоҳ (0)