“Atletik B” futbol klubining 23 yoshli tarbiyalanuvchisi YTH oqibatida vafot etdi

Bilbaoning “Atletik” klubi tarbiyalanuvchisi Aytor Gandiaga YTH oqibatida hayotdan ko‘z yumdi. Bu haqda bilbaoliklar matbuot xizmati ma’lum qildi.

Mundo Deportivo xabariga ko‘ra, avariya 3-yanvar kuni sodir bo‘lgan. 23 yoshli futbolchi boshqaruvidagi Peugeot avtomobili Scania avtobusi bilan to‘qnashib ketgan. Yarim himoyachi voqea joyida vafot etgan. Shuningdek, avtobus haydovchisi va yo‘lovchilardan biri jarohat olgan, ularga joyning o‘zida tez tibbiy yordam ko‘rsatilgan. Ayni damda YTHga nima sabab bo‘lgani noma’lum.

Avvalroq “Atletik” Gandiagani to‘liq o‘yin amaliyoti bilan ta’minlash uchun uni uchinchi divizion vakili “Gernik” klubiga ijaraga berib yuborgandi.

“Atletik” klubi va jamoaning qator o‘yinchilari sodir bo‘lgan noxush voqea yuzasidan hamdardlik bildirgan.