Namanganda yo‘llar holatidan kelib chiqib “qizil”, “sariq” va “yashil” hududlarga ajratiladi. Bu haqda viloyat hokimi Shavkatjon Abdurazzoqov ma’lum qildi, deya xabar beradi “Daryo” muxbiri Azizbek Abduvaliyev.
— Yangi yilning dastlabki kunlarini yo‘llar mavzusidan boshlayotganimiz bejiz emas. Bu yil Namanganda yo‘llar biz uchun siyosatga aylanadi. Ortiqcha bir so‘m topsak ham yo‘lga sarflaymiz. Shu orqali yillar mobaynida e’tibordan chetda qolgan yo‘llarimiz holatini o‘nglaymiz, avtomobil tiqinlari muammosini yechishga harakat qilamiz, — dedi Shavkatjon Abdurazzoqov.
Viloyatda 2021-yili umumiy uzunligi 415 kilometr bo‘lgan yo‘llarni qurish va ta’mirlash ko‘zda tutilgan. Buning uchun 531 milliard so‘mdan ortiq mablag‘ sarflanadi.
Jumladan, Kurnos—Arab—G‘ova umumiy foydalanishdagi avtomobil yo‘lini qurish, Kosonsoy—Pop yo‘nalishida 3,6 kilometr uzunlikda yangi avtomobil yo‘li barpo etish rejalashtirilmoqda.
Izoh (0)