Toshkent viloyati Bo‘stonliq tumanining tog‘li qismida joylashgan ayrim yo‘llarda 5-yanvar kuniga qadar avtomobillarning bir tomonlama harakati tashkil etiladi. Bu haqda IIV YHXBB axborot xizmati “Daryo”ga ma’lum qildi.
Avvalroq Chimyonda dam oluvchilar sonining keskin ortib ketgani sabab tog‘ga ko‘tarilish yo‘lida mashinalar harakati vaqtincha cheklangani to‘g‘risida xabar berilgandi.
Ma’lum qilinishicha, tumandagi yo‘llarning o‘tkazuvchanlik qobiliyatini inobatga olinib, turli ko‘ngilsizliklarning oldini olish maqsadida avtomobillar harakatlanishi cheklanmoqda.
“5-yanvar kuniga qadar 4R-12 Bektemir—Chorbog‘ avtomobil yo‘lining 61-kilometridan 4R-6 Toshkent—Chirchiq—Chimyon avtomobil yo‘lining 57-kilometriga o‘tish qismidan, ya’ni Bo‘stonliq tumanining G‘azalkent shahridan chiqish joyidan to 4R-6 avtomobil yo‘lining 87-kilometriga — Bo‘stonliq tumani Yusufxona aholi yashash joyiga qadar avtomobillarning harakatlanishi bir tomonlama qilib tashkil etiladi”, — deyiladi xabarda.
Idora matbuot xizmati ushbu holatda barcha haydovchilardan vaziyatni to‘g‘ri tushunib, o‘rnatilgan yo‘l belgilariga rioya qilishni, xizmatga jalb qilingan YPX inspektorlarining ishora va ko‘rsatmalariga amal qilib harakatlanishni so‘raydi.
Eslatib o‘tamiz, Yangi yil bayrami arafasidagi dam olish kunlari 2020-yil 3-dekabrdagi Prezident farmoni asosida belgilangan. Unga ko‘ra, 2-yanvar, shanba kuni 6 kunlik ish haftasida mehnat qilayotganlar uchun ham dam olish kuni hisoblanadi.
Izoh (0)