Qamchiq dovonida 1-yanvarga o‘tar kechasi suv xo‘jaligi vaziri o‘rinbosarining oila a’zolari bo‘lgan avtomobil halokatga uchradi. YTH oqibatida vazir o‘rinbosarining rafiqasi va 3 yoshli qizi vafot etgan, amaldorning o‘zi tan jarohatlari bilan shifoxonaga yotqizilgan, deb xabar beradi “Kun.uz”.
Ma’lum qilinishicha, Chevrolet Gentra rusumli avtomobil chuqurlikka qulab tushgan. 2-yanvar kuni Toshkent shahrida marhumlarning dafn marosimi o‘tkazilgan.
Namangan viloyat IIB axborot xizmatining ma’lumotlariga ko‘ra, mazkur yo‘l-transport hodisasi yuzasidan jinoyat ishi qo‘zg‘atilgan.
“2020-yil 31-dekabr kuni soat 23:00 larda A-373 Toshkent–O‘sh yo‘lining Pop tumani ‘Qo‘shminor’ MFY hududidan o‘tuvchi 258-kilometrida Toshkent—Qo‘qon yo‘nalishi bo‘yicha Chevrolet Gentra rusumli avtomashinasini boshqarib kelayotgan 24 yoshli fuqaro o‘zidan oldinda harakatlanib ketayotgan Chevrolet Gentra avtomashinasining orqa chap tomon qismiga urilib ketgan.
Natijada oldindagi Chevrolet Gentra avtomobili yo‘l chetiga chiqib ketib, qiyalikka ag‘darilib ketgan. Haydovchining avtomashina salonida bo‘lgan 1986-yilda tug‘ilgan turmush o‘rtog‘i va 2017-yilda tug‘ilgan qizi olgan tan jarohati oqibatida shifoxonada vafot etgan.
Ushbu holat bo‘yicha Pop tuman IIB huzuridagi TB tomonidan 2021-yil 1-yanvar kuni Jinoyat kodeksining 266-moddasi 3-qismi bilan jinoyat ishi qo‘zg‘atilgan”, — deyiladi xabarda.
Suv xo‘jaligi vazirligi matbuot xizmati nashrga ma’lum qilishicha, YTHga uchragan vazir o‘rinbosari Vohid Ahmadjonov bo‘lib, u shaxsiy avtomobilida harakatlangan va oilasi bilan Yangi yil bayramini nishonlash uchun vodiyga ketayotgan bo‘lgan.
Eslatib o‘tamiz, dekabr o‘rtalarida Namanganda MAN va Nexia ishtirokida yuz bergan YTH oqibatida 6 kishi halok bo‘lgan, ulardan 4 nafari bir oila vakillari edi. Avtohalokat sabablarini o‘rganish uchun maxsus komissiya tuzilgan.
Izoh (0)