Turkiyada 21-noyabrdan dam olish kunlari komendantlik soati joriy qilingan. Dastlab cheklovlar faqat kechki va tungi vaqtlarga taalluqli edi, ammo 30-noyabrdan kiritilgan yangi cheklovlar tufayli kecha-yu kunduz amal qilmoqda.
Qoidabuzarlar jarimaga tortiladi. Bundan tashqari 2020-yil 1-dekabrdan kuchga kirgan choralar qatoriga ish kunlari mahalliy vaqt bilan soat 21:00 dan ertalab soat 05:00 gacha mamlakat bo‘ylab amalda bo‘ladigan komendantlik soati bor. 20 yoshgacha bo‘lgan va 65 yoshdan katta kishilarga jamoat transportidan foydalanish taqiqlandi. Restoranlarga faqat yetkazib berish uchun ishlashga ruxsat berildi. Savdo markazlariga tashrif buyurish uchun maxsus ruxsatnoma olish kerak bo‘ladi. Mazkur tartib e’lon qilinganidan keyin Turkiya IIV bu choralar sayyohlar uchun amal qilmasligini bildirdi.
Turkiya prezidenti Rajab Toyyib Erdo‘g‘on 14-dekabr kuni Yangi yil bayrami vaqtida — 31-dekabr kuni soat 21:00 dan 4-yanvar soat 05:00 ga qadar mamlakatda komendantlik soati amal qilishini ma’lum qilgan. Turkiya madaniyat va turizm vazirligi vakilining aytishicha, komendantlik soati xorijlik turistlarga taalluqli emas, biroq 30-dekabrda Turkiya Ichki ishlar vazirligi xorijlik turistlarga ham taalluqli cheklovlarni bildirgan. Unga ko‘ra, 31-dekabr soat 21:00dan 1-yanvar soat 10:00gacha Turkiyadagi barcha shaharlarning markaziy ko‘cha va maydonlariga chiqish taqiqlangan edi. Bundan tashqari, 31-dekabrdan 4-yanvargacha mehmonxonalarda har qanday ommaviy ko‘ngilochar tadbirlar o‘tkazish mumkin emas.
“Daryo” fotomuxbiri mamlakatning eng gavjum va mashhur megapolisi — Istanbulda dam olish kunlaridagi komendantlik soatlari qanday o‘tayotganini kadrlarga muhrladi.
Eslatib o‘tamiz, 28-dekabrdan boshlab Turkiya hududiga aviaparvozlar orqali uchib keladigan yo‘lovchilar koronavirusga topshirgan testining salbiy natijasini taqdim etishi kerak. Ushbu qoida 30-dekabrdan boshlab yerusti transportida sayohat qiladigan sayyohlar uchun ham amalda bo‘ladi. So‘nggi 72 soat davomidagi koronavirusga testi manfiy natijalari to‘g‘risida ma’lumotnoma taqdim etgan xorijliklar mamlakat hududiga kiritiladi. Hujjat yo‘q bo‘lsa, kiritilmaydi.
Mavzuga doir:
- Turkiya sog‘liqni saqlash vaziri Rossiya vaksinasidan voz kechilgani haqidagi xabarlarni rad etdi
- O‘zbekiston va Turkiya qurilish mutaxassisligiga ega migrantlarni ish bilan ta’minlash to‘g‘risida kelishuvga erishdi
- Turkiyada 2016-yildagi davlat to‘ntarishiga urinish ishi bo‘yicha qariyb 200 kishi qo‘lga olindi
- Pandemiya bilan yashayotgan Turkiya — suratlarda
Izoh (0)