Туркияда 21 ноябрдан дам олиш кунлари комендантлик соати жорий қилинган. Дастлаб чекловлар фақат кечки ва тунги вақтларга тааллуқли эди, аммо 30 ноябрдан киритилган янги чекловлар туфайли кеча-ю кундуз амал қилмоқда.
Қоидабузарлар жаримага тортилади. Бундан ташқари 2020 йил 1 декабрдан кучга кирган чоралар қаторига иш кунлари маҳаллий вақт билан соат 21:00 дан эрталаб соат 05:00 гача мамлакат бўйлаб амалда бўладиган комендантлик соати бор. 20 ёшгача бўлган ва 65 ёшдан катта кишиларга жамоат транспортидан фойдаланиш тақиқланди. Ресторанларга фақат етказиб бериш учун ишлашга рухсат берилди. Савдо марказларига ташриф буюриш учун махсус рухсатнома олиш керак бўлади. Мазкур тартиб эълон қилинганидан кейин Туркия ИИВ бу чоралар сайёҳлар учун амал қилмаслигини билдирди.
Туркия президенти Ражаб Тоййиб Эрдўғон 14 декабрь куни Янги йил байрами вақтида — 31 декабрь куни соат 21:00 дан 4 январь соат 05:00 га қадар мамлакатда комендантлик соати амал қилишини маълум қилган. Туркия маданият ва туризм вазирлиги вакилининг айтишича, комендантлик соати хорижлик туристларга тааллуқли эмас, бироқ 30 декабрда Туркия Ички ишлар вазирлиги хорижлик туристларга ҳам тааллуқли чекловларни билдирган. Унга кўра, 31 декабрь соат 21:00дан 1 январь соат 10:00гача Туркиядаги барча шаҳарларнинг марказий кўча ва майдонларига чиқиш тақиқланган эди. Бундан ташқари, 31 декабрдан 4 январгача меҳмонхоналарда ҳар қандай оммавий кўнгилочар тадбирлар ўтказиш мумкин эмас.
«Дарё» фотомухбири мамлакатнинг энг гавжум ва машҳур мегаполиси — Истанбулда дам олиш кунларидаги комендантлик соатлари қандай ўтаётганини кадрларга муҳрлади.
Эслатиб ўтамиз, 28 декабрдан бошлаб Туркия ҳудудига авиапарвозлар орқали учиб келадиган йўловчилар коронавирусга топширган тестининг салбий натижасини тақдим этиши керак. Ушбу қоида 30 декабрдан бошлаб ерусти транспортида саёҳат қиладиган сайёҳлар учун ҳам амалда бўлади. Сўнгги 72 соат давомидаги коронавирусга тести манфий натижалари тўғрисида маълумотнома тақдим этган хорижликлар мамлакат ҳудудига киритилади. Ҳужжат йўқ бўлса, киритилмайди.
Мавзуга доир:
- Туркия соғлиқни сақлаш вазири Россия вакцинасидан воз кечилгани ҳақидаги хабарларни рад этди
- Ўзбекистон ва Туркия қурилиш мутахассислигига эга мигрантларни иш билан таъминлаш тўғрисида келишувга эришди
- Туркияда 2016 йилдаги давлат тўнтаришига уриниш иши бўйича қарийб 200 киши қўлга олинди
- Пандемия билан яшаётган Туркия — суратларда
Изоҳ (0)