Pandemiya bilan yashayotgan Turkiya — suratlarda

Avval xabar berganimizdek, “Pandemiya sharoitida turizm” loyihasini tashkil qilgan Turkiya madaniyat va turizm vazirligi o‘zbekistonlik jurnalist va blogerlar qatorida “Daryo” muxbirini ham Turkiyaning Istanbul va Antaliya shaharlariga taklif etgan edi.

Safar dasturining ilk kunida guruh turizm sohasi eng taraqqiy etgan hududlaridan biri Istanbulning shahar markazidan shimoli-g‘arbgacha 35 kilometr uzoqlikdagi yangi aeroportiga kelib qo‘ndi. Ayni vaqtda u yiliga 90 million yo‘lovchini qabul qiladi. Yaqin 10 yilda ushbu ko‘rsatkichni 200 millionga chiqarish rejalashtirilmoqda. Aeroportda bitta ulkan terminal mahalliy va xalqaro aviaqatnovlarni qabul qiluvchi hududlarga ajratilgan. Unda 5 ta pirs-bloklar va 114 ta (Otaturk aeroportida 41 ta) geyt mavjud. A, B, D va F xalqaro, G mahalliy aviaqatnovlar uchun mo‘ljallangan.

Mavzuga doir: Turkiya turizmi 2020-yilda qay holatda? Turizmni rivojlantirish va targ‘ib qilish agentligi vakili javob berdi

Asosiy terminaldagi Duty Free hududining umumiy o‘lchami 55 ming kvadrat metr. Ulardan 34 ming kvadrat metri klassik mahsulotlarga ega mavzuli hududlar, 18 ming kvadrati lyuks toifadagi brend do‘konlar, 3 ming kvadrati esa mahalliy ishlab chiqaruvchilarning mahsulotlaridan iborat bozorni tashkil qiladi. Yana 32 ming kvadrat metri qahvaxona hamda restoranlarga berilgan. 3 yarim ming xavfsizlik xizmati xodimlari va 9 ming dona videokamera xavfsizlikka javob beradi. Aviaxavfsizlik nazorati standart.

Aviaxavfsizlik hududida chipta taloni, elektron vositalar, noutbuk yoki planshetlar chiqarib maxus idishlarga solib nazoratdan o‘tkaziladi. Har bir yo‘lovchidan keyin buyumlar solingan idishlar dezinfeksiya qilinadi. Aeroportda ijtimoiy masofa saqlash, dezinfeksiya qilish, pandemiya qoidalariga rioya qilish haqida eslatmalar mavjud. Bu kabi e’lonlar karnaylar orqali ham bir necha marta qaytariladi.

Sayyohlar uchun sug‘urta paketlari ishlab chiqilgan. COVID-19 testini o‘z ichiga olgan tibbiy sug‘urta paketi tashkil etilgan. Unga ko‘ra, shartnoma bilan aeroportlardan olingan aviachiptalar, turli savdo joylari, tur operatorlar va onlayn kanallar orqali xarid qilish mumkin bo‘lgan 15, 19 va 23 yevrolik sug‘urta paketlari doirasida 3 ming, 5 ming va 7 ming yevrogacha barcha tibbiy xarajatlar qoplanadi. Aeroportda, samolyotda, jamoat joylarida niqobni talablarga muvofiq taqmaganlarni mas’ul xodimlar kelib ogohlantirib ketish holatlarini har qadamda uchratasiz.

Pandemiya sharoitida sayyohlar xavfsizligini ta’minlash masalasi o‘ta dolzarb vazifa ekanligini aynan aeoport ostonasidan anglab olish oson. Turkiyaning Madaniyat va turizm vazirligi 2020-yil yozidan amalga kiritilgan “Sog‘lom turizm sertifikati” dasturini ishlab chiqib ishga tushirgan. Madaniyat va turizm vazirligi boshchiligida, Ichki ishlar va Tashqi ishlar vazirligi ishtirokida hamda turizm sanoatining barcha asosiy ishtirokchilari bilan yaqin hamkorlikda o‘tkazilayotgan “Sog‘lom turizmni sertifikatlash” dasturi turizm sohasidagi tashkilotlar tomonidan, turistik sektor mehmonlari va xodimlarining salomatligi, ularni tashish, joylashtirish borasidagi tatbiq qilinishi shart bo‘lgan, keng ko‘lamdagi tadbirlar ustidan oliy darajadagi nazoratni amalga oshiradi. Xalqaro sertifikatlash idoralari tomonidan beriladigan ushbu sertifikat aviakompaniyalar, aeroportlar va boshqa transport obyektlari, turar joy sektori, hamda jamoat ovqatlanish tashkilotlarida Sog‘liqni saqlash, mehnat gigiyenasi bo‘yicha yuqori talablarning bajarilishini hujjatlashtirilgan tarzda tasdiqlaydi.

Mehmonlarning Turkiyada ta’tilni xotirjamlikda o‘tkazishini ta’minlovchi “Xavfsiz turizm sertifikati” dasturiga oid barcha ma’lumotlar to‘g‘risida tga.gov.tr saytida o‘qish mumkin.

Quyida “Daryo” muxbirining pandemiya sharoitida hayot kechirayotgan Istanbul va Antaliya shaharlaridan tayyorlagan fotolavhalarini tomosha qilishingiz mumkin.

Istanbul shahri ko‘chalari

Grand bozor 

Antaliya shahri

Antaliya O‘rtayer dengizi sohillarida joylashgan eng mashhur kurort shaharlardan hisoblanadi. Mamlakat janubidagi ushbu shahar tarixda Pamfiliya deb nomlangan. To‘rt tomoni Tavr tog‘lari bilan qurshalgan hududni bir vaqtlar Mustafo Kamol Otaturk “Turk sohillarining go‘zal shahri”, deb atagan. Jannatmakon hudud tabiat va mehnatkash odamlar qo‘li bilan bunyod etilgan. Ekzotik bog‘lari, dengiz bo‘yidagi so‘lim go‘shalari va palmalar alleyalaridan bahra olish mumkin.

Iqlimi iliq, barqaror bo‘lgani sababli yil bo‘yi sayyohlar uchun maqbul maskan hisoblanadi. Rimliklar va saljuqiylar tomonidan bunyod qilingan eski shahar qadim qurilish namunalari, minora va masjidlar, sershovqin savdo kvartallaridan iborat bo‘lgani sababli haqiqiy sharq nafasi kelib turadi.

Mavzuga doir: Turkiyaning Antaliya shahri xorijlik turistlarni qabul qilish bo‘yicha rekord o‘rnatdi

Mavzuga doir: “Pandemiya sharoitida turizm”: Istanbuldagi Sulton Ahmad yoki ippodrom maydoniga sayohat

Mavzuga doir: Qadimiy Rim nafasi kelib turadigan bir necha asrlik Turkiya shaharlari — suratlarda

Safar oxirida jurnalistlar Antaliyadagi Dyuden sharsharasiga olib kelindi. Ma’lumotga ko‘ra sharshara bosimi Antaliyadan 30 kilometr masofada bo‘lgan Dyuden daryosi irmog‘idan boshlanadi. Shaharda asli ikkita sharshara bo‘lib, Yuqori Dyuden va Quyi Dyuden deb nomlangan. Yuqori Dyuden Antaliya markazidan 10 kilometr uzoqlikda joylashgan. Quyi Dyuden esa shahardan 8 kilometr uzoqlikda O‘rtayer dengizi sohilida qad rostlagan. Quyida ana shu dengiz sohilidagi sharsharani ko‘rishingiz mumkin.

Eslatib o‘tamiz, Turkiya prezidenti Rajab Toyyib Erdo‘g‘on 30-noyabr kuni koronavirus tarqalishiga qarshi cheklov choralari kuchaytirilishini ma’lum qilgan, unga ko‘ra, ish kunlari mahalliy vaqt bilan soat 21:00 dan ertalab soat 05:00 gacha mamlakat bo‘ylab amalda bo‘ladigan komendantlik soati kirgan. Dam olish kunlari — juma kuni soat 21:00 dan, dushanba kuni ertalab soat 05:00 gacha odamlarning ko‘chaga chiqishi taqiqlanadi.

Bungacha Turkiyada faqat dam olish kunlari komendantlik soati mavjud edi. Rajab Toyyib Erdo‘g‘on 17-noyabr kuni COVID-19 pandemiyasi sababli yangi cheklov choralari joriy etilishini ma’lum qilgandi. Mavzuga doir:

• “Daryo” fotosayohati: “Pandemiya sharoitida turizm”ga moslashgan Ayo Sofiya va Sulton Ahmad masjidlari
•  Foto: Turkiyadagi eng katta saroy — Dolmabaxchega sayohat
• “Daryo” fotosayohati: Turkiyaning Istanbul shahridagi Taqsim maydoni va Istiqlol ko‘chasi manzaralari
• “Daryo” fotosayohati: Kemalar, dengiz vokzali, baliq tutayotgan odamlardan iborat Bosfor bo‘g‘ozi