Қамчиқ довонида 1 январга ўтар кечаси сув хўжалиги вазири ўринбосарининг оила аъзолари бўлган автомобиль ҳалокатга учради. ЙТҲ оқибатида вазир ўринбосарининг рафиқаси ва 3 ёшли қизи вафот этган, амалдорнинг ўзи тан жароҳатлари билан шифохонага ётқизилган, деб хабар беради «Kun.uz».
Маълум қилинишича, Chevrolet Gentra русумли автомобиль чуқурликка қулаб тушган. 2 январь куни Тошкент шаҳрида марҳумларнинг дафн маросими ўтказилган.
Наманган вилоят ИИБ ахборот хизматининг маълумотларига кўра, мазкур йўл-транспорт ҳодисаси юзасидан жиноят иши қўзғатилган.
«2020 йил 31 декабрь куни соат 23:00 ларда А-373 Тошкент–Ўш йўлининг Поп тумани ‘Қўшминор’ МФЙ ҳудудидан ўтувчи 258-километрида Тошкент—Қўқон йўналиши бўйича Chevrolet Gentra русумли автомашинасини бошқариб келаётган 24 ёшли фуқаро ўзидан олдинда ҳаракатланиб кетаётган Chevrolet Gentra автомашинасининг орқа чап томон қисмига урилиб кетган.
Натижада олдиндаги Chevrolet Gentra автомобили йўл четига чиқиб кетиб, қияликка ағдарилиб кетган. Ҳайдовчининг автомашина салонида бўлган 1986 йилда туғилган турмуш ўртоғи ва 2017 йилда туғилган қизи олган тан жароҳати оқибатида шифохонада вафот этган.
Ушбу ҳолат бўйича Поп туман ИИБ ҳузуридаги ТБ томонидан 2021 йил 1 январь куни Жиноят кодексининг 266-моддаси 3-қисми билан жиноят иши қўзғатилган», — дейилади хабарда.
Сув хўжалиги вазирлиги матбуот хизмати нашрга маълум қилишича, ЙТҲга учраган вазир ўринбосари Воҳид Аҳмаджонов бўлиб, у шахсий автомобилида ҳаракатланган ва оиласи билан Янги йил байрамини нишонлаш учун водийга кетаётган бўлган.
Эслатиб ўтамиз, декабрь ўрталарида Наманганда MAN ва Nexia иштирокида юз берган ЙТҲ оқибатида 6 киши ҳалок бўлган, улардан 4 нафари бир оила вакиллари эди. Автоҳалокат сабабларини ўрганиш учун махсус комиссия тузилган.
Изоҳ (0)