Qashqadaryo viloyatida tez yordam xodimlari koronavirus pandemiyasi davrida kasallikka qarshi kurashgan shifokor va tez yordam haydovchilariga rag‘bat puli to‘lanmayotganidan shikoyat qilmoqda.
“Daryo” muxbiri Qarshi shahar tez tibbiy yordam stansiyasining Vazirlar Mahkamasining 2020-yil 20-iyuldagi “Koronavirus infeksiyasiga qarshi kurash davrida aholini tez tibbiy yordam xizmati bilan keng qamrab olish chora-tadbirlari to‘g‘risida”gi 446-sonli va 2020-yilning 24-sentabr kuni qabul qilingan “O‘zbekiston Respublikasida koronavirus infeksiyasi tarqalishining oldini olish tadbirlariga ajratilayotgan mablag‘larning samaradorligini ta’minlashga oid qo‘shimcha chora-tadbirlar to‘g‘risida”gi 583-sonli qarorlarida nazarda tutilgan rag‘batlantirish to‘lovlari to‘lanmayotganidan norozi vakillari bilan suhbatlashdi.
“Biz koronavirus pandemiyasi davrida kasallikka chalinganlar bilan ishlaganimiz uchun to‘lab berilishi lozim bo‘lgan rag‘bat pullari bor edi. Biroq shu pullar to‘lab berilmagani sabab biz o‘z ma’muriyatimizga, mas’ullarga murojaat qildik. Sog‘liqni saqlash boshqarmasidan bu haqda topshiriq berilmagan degan javob bo‘ldi. Shundan so‘ng Prezident qabulxonasi, Virtual qabulxonalar, prokuratura va boshqa tashkilotlarga murojaat qildik. Ammo birorta tashkilotdan tayinli javob ololmadik. Viloyat moliya boshqarmasi bizga bu haqda ko‘rsatma berishmagan, shuning uchun to‘lab berilmaydi deya javob berdi”, — deydi Qarshi shahar tez tibbiy yordam stansiyasi shifokori Ramiz Rahmonov.
Tez yordam shifokorlarining aytishicha, ular koronavirus bilan kasallangan bemorlar xonadonida bo‘lib, ularni tibbiy ko‘rikdan o‘tkazgan. Ahvoli og‘ir bemorlarni boshqa shifoxonalarga o‘tkazishda ham ishtirok etgan.
“Biz ham COVID-19 brigadalarida bemorlar xonadoniga borib, bemorlar bilan ishladik. Hatto og‘ir ahvoldagi bemorlarni boshqa shifoxonalarga o‘tkazishda ishtirok etdik. Shu sabab o‘zimiz ham koronavirus yuqtirib oldik. Davolanib ham chiqdik. Biz koronavirus yuqtirib olganimiz uchun hech qanday pul so‘ramayapmiz, bizga faqat va’da qilingan olti foizlik rag‘bat pullari to‘lab berilsa, bas”, — dedi shifokor Hamza Abilov.
Tez yordamning yana bir shifokori Abdulla Rashidovning ma’lumot berishicha, koronavirusga qarshi kurashgan shifokorlarning aksariyati kasallik yuqtirib olgan va davolangan. Ayni paytda davolanayotganlarga esa e’tibor yo‘q.
“Pandemiya davrida ko‘p marotaba chaqiruvlarga chiqib, koronavirus yuqtirgan bemorlar bilan ishlab, kasallik ham yuqtirib oldim. Mendek kasallik yuqtirib, hozir ham davolanayotganlar bor. Ammo ularga e’tibor yo‘q. Bizga esa va’da qilingan rag‘bat pullarini ham to‘lab berishmayapti”, — deydi Abdulla Rashidov.
Shifokor G‘ayrat Usmonov ularga va’da qilingan rag‘bat puli to‘qqiz oydan buyon to‘lanmayotganini aytsa, tez yordam haydovchisi Musaxon Jalolov boshqa viloyatlarda hamkasblariga va’da qilingan pullar to‘lab berilganini aytmoqda.
“Bizga berilishi kerak bo‘lgan rag‘bat pullari qo‘limizga tegmayapti. Eshitishimiz bo‘yicha, boshqa viloyatlarda tez yordam xodimlariga to‘lanishi lozim bo‘lgan rag‘bat pullari berilgan. Buni o‘sha viloyatdagi hamkasblarimiz ham tasdiqlashdi. Ammo bizda paysalga solinmoqda. Biz shuning sababini bilmoqchimiz. Mas’ullar bizga rag‘bat puli to‘lanishi lozimligini nazarda tutuvchi qarorlarni ham bajarmayapti”, — deydi tez yordam haydovchisi Musaxon Jalolov.
“Daryo” muxbiri bilan suhbatlashgan viloyat Sog‘liqni saqlash boshqarmasi bosh iqtisodchisi Shomurod Boymurodov bunday vaziyat kelib chiqishiga Qarshi shahar tez tibbiy yordam stansiyasi rahbariyati aybdor ekanini, ular o‘z vaqtida rag‘batlantirilishi lozim bo‘lgan xodimlar ro‘yxatini taqdim etmaganini aytsa, Qarshi shahar tez tibbiy yordam stansiyasi boshlig‘i Ulash Vohidov esa “bizdan endi ro‘yxat so‘rashdi”, dedi.
“Bunday vaziyat kelib chiqishiga yuz foiz Qarshi shahar tez tibbiy yordam stansiyasi rahbariyati aybdor. Sababi ular o‘z vaqtida rag‘batlantirilishi lozim bo‘lganlar ro‘yxatini bizga bermagan. Shu sabab o‘sha va’da qilingan rag‘bat pullari haligacha to‘lab berilmagan. Ammo endi ro‘yxat taqdim etilyapti va tez orada to‘lab beriladi”, — dedi Shomurod Boymurodov.
“Bizdan endi ro‘yxat so‘rashdi. Va biz endilikda o‘sha ro‘yxatni tuzib, rag‘batlantirilishi lozim bo‘lganlar ism-familiyasi va ishlagan paytini ko‘rsatib taqdim etyapmiz”, — deydi Qarshi shahar tez tibbiy yordam stansiyasi boshlig‘i Ulash Vohidov.
Ulash Vohidovning ma’lumot berishicha, koronavirus pandemiyasi davrida shahar tez tibbiy yordam stansiyasidagi mavjud 21 ta brigadaning 3 tasi koronavirus bemorlarini tashishi rejalashtirilgan.
“Biroq shifoxonalarga iyun oyida 10 nafar, iyul oyida 342 nafar va avgust oyida 325 nafar koronavirus bilan kasallangan bemor olib borilgan bo‘lsa, shuncha bemorni o‘sha belgilangan 3 ta brigada olib bordi desak, xato qilamiz. Barcha brigadalar bemor tashidi. To‘g‘ri, qaysidir brigada balki oy davomida 1 nafar bemorni shifoxonaga yetkazgan bo‘lishi mumkin. Ammo shu ishda ishtirok etdi. Biz endilikda o‘sha brigada va nechchi nafar bemor yetkazilganini aniqlashtirib, ro‘yxat taqdim qilyapmiz. Sababi qarorda bajarilgan ish hajmiga qarab rag‘batlantirilishi lozimligi qo‘shimcha qilingan”, — dedi Ulash Vohidov.
Tez tibbiy yordam haydovchilari qish mavsumida ishlash ular uchun qiyinchilik tug‘dirayotganini, brigadalarga ajratilgan avtomobillar talabga javob bermayotganini ham aytmoqda.
“Vaqtida ‘zapchast’ berilmaydi, ‘zapchast’ni xuddi o‘zimizni mashinamizga so‘rayotgandek, yalinib olamiz. Mashina talabga javob bermagani sabab ko‘chada qolib ketish holatlarimiz ham bo‘ladi. Shaxsan o‘zim bir yildan beri benzin nasos so‘rayman, ololmayman. Qish masumida avtomobillarimizga sifatli moy va talabga javob bermaydigan antifriz solganimiz bois, qiynalib ketyapmiz. Stansiyadagi hojatxonaga borsangiz, ahvoliga qarab bo‘lmaydi. Umuman qarov yo‘q, shart-sharoit yo‘q”, — deydi haydovchi Asqar Abdullayev.
“Daryo” muxbiri bilan suhbatlashgan mas’ullar tilga olingan kamchiliklar tez orada bartaraf etilishini, tez yordam xodimlariga to‘lab berilishi lozim bo‘lgan rag‘bat pullari ham yaqin kunlarda to‘lanishini va’da qildi.
Izoh (0)