Energetika vazirligi davlat-xususiy sherikligi asosida quyosh fotoelektr stansiyasi (FES) qurilishi bo‘yicha Scaling Solar 3 uchinchi loyihasi boshlanishini ma’lum qildi.
Scaling Solar 3 uchinchi loyihasi doirasida umumiy quvvati 500 MVt bo‘lgan uchta FES qurilishi rejalashtirilib, ularning investorlari tender natijasiga ko‘ra aniqlanadi. Uchinchi loyiha boshlanishi 2021-yil fevral oyiga rejalashtirilgan.
FES qurilishi Buxoro, Namangan va Xorazm viloyatlarida amalga oshirilishi ko‘zda tutilmoqda.
2019-yil 18-oktabr kuni Scaling Solar 1 loyihasi doirasida Navoiy viloyatida quvvati 100 MVt bo‘lgan FES qurilishi bo‘yicha o‘tkazilgan tenderda Masdar (BAA) kompaniyasi g‘olib bo‘lgan edi. O‘zbekiston hukumati va Xalqaro moliya korporatsiyasi o‘rtasida konsultatsiya xizmatlarini jalb qilish va Scaling Solar loyihasi bo‘yicha quyosh FESlarining quvvatini 1000 MVt gacha oshirish bo‘yicha kelishuv imzolangan.
Mazkur kelishuv natijasida 2020-yil boshida Samarqand va Jizzax viloyatlarida umumiy quvvati 400 MVt bo‘lgan 2 ta Scaling Solar 2 FES qurilishi loyihasi bo‘yicha tender e’lon qilingan edi. Ushbu loyihalar bo‘yicha hozirgi vaqtda tender savdolari amalga oshirilmoqda.
Hukumat tomonidan keng miqyosli qayta tiklanuvchi energiya strategiyasi amalga oshirilib, uning doirasida yaqin 10 yil ichida 5 GVt gacha ekologik toza quyosh energiyasini ishlab chiqish rejalashtirilgan. Strategiya elektr energiyasiga tobora ortib borayotgan ehtiyojni qondirishga qaratilgan bo‘lib, 2020—2030-yillarda O‘zbekistonni elektr energiyasi bilan ta’minlash konsepsiyasi doirasida amalga oshirilmoqda.
Avvalroq O‘zbekiston 2030-yilga qadar qayta tiklanadigan energiya manbalari ulushini 25 foizgacha oshirishi mumkinligi to‘g‘risida xabar berilgandi.
Izoh (0)