Moskvaning “Lokomotiv” klubi yarim himoyachisi, hozirda “Tambov” safida ijarada o‘ynayotgan Jasur Jaloliddinovning agenti Yuriy Belous mijozi bilan bog‘liq vaziyat va unga bo‘layotgan qiziqishlar haqida gapirdi.
RPLda o‘yin amaliyotiga ega bo‘lolmayotgani haqida“Barcha bu yigit o‘ynab keta olishiga umid qilmoqda. U O‘zbekistonning eng iqtidorli futbolchilaridan biri. “Lokomotiv” nima sababdan uni avvaliga RPL ro‘yxatidan o‘tkazib, keyinchalik chiqarib yuborganini tushunish qiyin.
“Tambov”ga keladigan bo‘lsa, u o‘ynab keta olardi, biroq O‘zbekiston yoshlar terma jamoasidan chaqiruv bo‘lib qoldi. Unga o‘yin amaliyoti kerak. Vaziyat qanday tus olishini kuzatamiz. Sababi bizga avvaliga u “Lokomotiv” bilan yig‘inga yo‘l olishi aytildi. Keyin esa bormasligi ma’lum bo‘ldi. Yangi yil bayramidan keyin qaror qabul qilamiz”.
Jaloliddinovga Yevropadan qiziqish bo‘layotgani haqida
“Shubhasiz. O‘zbekistonlik futbolchilarni Koreya va BAAdan bajonidil qabul qilishadi, biroq u Rossiyada o‘ynab ketishini xohlardik. Agar bu sodir bo‘lmasa, u holda “Lokomotiv” vakillari bilan muhokama qilamiz. Turkiya va Ispaniya Segundasidan taklif bor.
“Lokomotiv” bosh murabbiyi Marko Nikolichning transferga munosabati haqida
“Bosh murabbiy bunga qiziqqandi. Biroq keyinchalik yangi futbolchilar paydo bo‘ldi va chet elliklar uchun ajratilgan kvota to‘lib qoldi. Qaydnomada Jaloliddinov uchun joy topilmadi. Nikolich bu vaziyatni sharhlamadi, klubning sobiq sport direktori ham”.
Jaloliddinov transfer borasida OAVda paydo bo‘lgan xabarlar haqida
“Bu borada sharh berishim noo‘rin bo‘ladi, bu tijoratga oid masala. Bunga biz tomondan munosabat bildirilishi noto‘g‘ri bo‘ladi. Kelishuvdagi barcha pullar “Bunyodkor”ga o‘tkazib berilganini bilaman va u erkin agent sifatida “Lokomotiv” safiga borib qo‘shildi.
Ha, u erkin agent maqomida “Lokomotiv”ga o‘tdi. Uning shartnomasida istalgan klub sotib olishi mumkin bo‘lgan tovon puli haqidagi band bor edi”.
“Lokomotiv” uning shartnomasini sotib olgani haqida
“Bunga izoh bermayman, klubdan so‘rang”.
Yuriy Belous, futbol agenti
Jaloliddinov iyul oyida “Lokomotiv” futbolchisiga aylandi. Biroq moskvaliklar yarim himoyachini Rossiya Premyer Ligasi ro‘yxatidan chiqarib yubordi va Jasur “Tambov”ga ijaraga berildi. Biroq 18 yoshli o‘yinchi “Tambov” safida ham birorta o‘yin o‘tkazmadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)