“Everton” klubi Angliya Premyer Ligasi 16-turi doirasida “Manchester Siti”ga qarshi bahsning qoldirilganiga o‘z munosabatini bildirdi.
28-dekabr kuni bo‘lib o‘tishi kerak bo‘lgan bahs boshlanishiga bir necha soat qolganda qoldirildi. Bunga sabab qilib “Manchester Siti” vakillarida koronavirusga chalinish holati kuzatilganini ko‘rsatildi.
“Everton” o‘z bayonotida uchrashuv qoldirilishiga nima sabab bo‘lganini aniq bilish maqsadida APLga so‘rov yuborganini ma’lum qildi.
Premyer Liga yo‘riqnomasiga ko‘ra agar jamoada 14 nafar sog‘ futbolchi topilmasa, u holda o‘yinni qoldirishga ruxsat beriladi. Mersisaydliklarning bu so‘rovi orqali haqiqatda “shaharliklar” jamoasida 14 nafar sog‘ futbolchi bo‘lmaganiga shubha bilan qaralayotgani va o‘yinni qoldirishda jamoalar o‘rtasida o‘zaro kelishuv bo‘lmaganini anglash mumkin.
Ta’kidlash joiz, avvalroq “Nyukasl”da beshta koronavirusga chalinish holati qayd etilgan va “hakkalar”ning “Aston Villa”ga qarshi o‘yini qoldirilgandi. Biroq u holatda “Aston Villa” uchrashuvni qoldirilishiga o‘z roziligini bergandi.
Shu tariqa agar “Manchester Siti” o‘yinni qoldirganiga yetarli sabablarni ko‘rsata olmasa, jamoaga texnik mag‘lubiyat yozilishi ehtimoli ham yo‘q emas.
Hozircha “Manchester Siti”ning yetti nafar a’zosida (besh nafar futbolchi, ikki nafari xodim) koronavirus aniqlangani aytilmoqda. Avvalroq manchesterliklar hujumchisi Gabriel Jezus, himoyachi Kayl Uoker va klubning yana ikki xodimi infeksiyani yuqtirib olgani ma’lum qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)