Yangi mavsumdagi yangi nomlar: 2020/21-yilgi mavsumda o‘zini tanitgan futbolchilar haqida

2020/21-yilgi mavsum uzoq vaqt davomida ko‘pchilikning yodida qolishi aniq. Bunga yetarlicha sabablar bor: birinchidan, mavsum kech va tomoshabinlarsiz boshlandi, ikkinchidan, taqvim juda tig‘iz tuzilgan, o‘yinlar oralig‘idagi muddat juda qisqa. Bunday sharoitda kimdir o‘zini yaxshi tomondan namoyon qilayotgan bo‘lsa, yana kimdir hanuzgacha optimal formasini tiklay olgani yo‘q. “Real”, “Barselona”, “Yuventus” va “Manchester Siti” kabi nomdor jamoalar mavsumni juda sust boshladi. Ko‘plab futbolchilar esa yo koronavirusga chalindi yoki jiddiy jarohatlar oldi.

Ammo ba’zi o‘yinchilarda yuqoridagilarning ta’siri deyarli sezilmadi va aksincha, ular dastlabki daqiqalardanoq o‘z muxlislarini xursand qilishni boshladi. Bular qatoriga Krishtianu Ronaldu, Zlatan Ibragimovich, Harri Keyn, Robert Levandovski va bir qator yulduzlarni kiritish mumkin. Biroq hozir ular to‘g‘risida emas, balki 2020/21-yilgi mavsumning boshida porlagan yangi nomlar haqida hikoya qilinadi.

Tayler Adams (“Leypsig”)

So‘nggi yillarda top-ligalarda amerikalik futbolchilar soni tobora ko‘payib bormoqda. Jumladan, “Nyu-York Red Bullz”ning sobiq vakili Tayler Adams ham Bundesligadagi muvaffaqiyatli legionerlardan biriga aylandi.

2019-yildan beri jamoada o‘ynayotgan Adamsning dastlabki mavsumda ishlari yurishmagandi, kamiga jarohat olib, yetti oyga safdan ham chiqqandi. Yulian Nagelsmann jamaoga kelganidan so‘ng esa ko‘pchilik amerikalikning klubdan ketishini taxmin qilgandi, ammo buning aksi sodir bo‘ldi: yosh mutaxassis Taylerga ishonch bildirdi, garchi o‘ziga begona bo‘lgan himoya pozitsiyada o‘ynashga to‘g‘ri kelgan bo‘lsa ham, Adams murabbiyni uyaltirib qo‘ymadi.

Aynan u Chempionlar Ligasidagi “Atletiko”ga qarshi o‘yinda g‘alaba golini urdi. Tayler maydonda o‘z o‘yinidan zavq olib o‘ynaydi, shu bilan birga u butun jamoaning saviyasini ham ko‘taradi. Ma’lumotlarga ko‘ra Tayler futboldan tashqari ta’lim olishni ham kanda qilmaydi – hozirda u psixologiya bo‘yicha ilmiy ish olib bormoqda.

“Ba’zan tezkorlik bilan moslasha olish va instinktlarga ishonish eng muhimi bo‘lib qoladi. Murabbiylar bizdan tezda moslashib, turli taktikalarda o‘ynashimizni kutadi. Shuning uchun men himoyada bo‘lsam ham, yarim himoyaga chiqib, raqiblarga bosim o‘tkaza olaman”.

Alessandro Bastoni (“Inter”)

2016/17-yilgi mavsumda “Atalanta”da debyutini o‘tkazgan Alessandro Bastoni tezda Italiyaning eng iqtidorli himoyachilaridan biriga aylandi.

21 yoshli “Inter” futbolchisi o‘zining to‘g‘ri pozitsiya tanlay olish mahorati, taktik zukkoligi va hujumdagi foydali o‘yinlari bilan ijobiy taassurot qoldirmoqda. 2019/20-yilgi mavsumda u 2 ta gol urib, Italiya terma jamoasida o‘z o‘rniga ega bo‘ldi.

Garchi, “Inter” uch himoyachi, Italiya esa to‘rt himoyachi sxemasini afzal ko‘rsa-da, Bastoni har ikkala uslubga osongina moslasha oladi.

Uzoq vaqtdan beri “Liverpul” qiziqib kelgan futbolchi asta-sekinlik bilan o‘sib bormoqda. Shubhasiz, bunda unga Antonio Konte katta yordam bermoqda.

“Men uning qo‘l ostida katta o‘sishga erishganimdan mamnunman. Men ham ruhan ham jismonan o‘sishga erishdim. O‘zimga bo‘lgan ishonchim har qachongidan ustun”.

Pedri

Pedri so‘nggi yillarda “Barselona” akademiyasida yetishib chiqqan eng yorqin iste’dodlardan biri.

U endigina 18 yoshga to‘lgan bo‘lishiga qaramay, allaqachon La Liga va Chempionlar Ligasida gol urishga erishdi. Ronald Kuman boshchiligidagi muammoli mavsumning bosimiga qaramay, u (juda) yaxshi harakat qilmoqda. Pedrini hatto Messi bilan ham taqqoslashmoqda! Ajablanarli yeri yo‘q, boisi yigitcha kamdan kam holatlarda tarkibdan tushib qoladi.

Pedri o‘zining ko‘p qirraliligi va taktik moslashuvchanligi bilan ajralib turadi, shu tufayli Kuman undan har ikkala qanot va yarim himoyada foydalanishi mumkin. Hozirda u jamoadoshlari Serxio Buskets, Miralem Pyanich kabi nomdor futbolchilardan ko‘proq o‘yin o‘tkazishga ulgurdi.

Ris Jeyms (“Chelsi”)

Ris Jeymsning kutilmaganda “Chelsi”ning asosiy futbolchisiga aylangani ko‘pchilikni hayratga qo‘ymay qolmadi.

21 yoshli himoyachi allaqachon Angliyaning eng yaxshi o‘ng qanot himoyachilari qatorida tilga olinmoqda. Agar u bundan ham ko‘proq golli uzatmalarni amalga oshiradigan bo‘lsa, hatto Trent Aleksander-Arnold ham xavotirlana boshlashi aniq. Jeymsning eng ustun jihati, bu uning krosslaridir. Shuningdek, u gollar ham urib turadi.

Shu bilan birga Jeyms yarim himoyada va hattoki hujumda ham yaxshi o‘ynaydi. “Aristokratlar” ustozi Frenk Lempard undan judayam mamnun ekanligini yashirib o‘tirmadi:

“Uning o‘sish sur’ati hayratlanarli darajada. U “Uigan”da o‘ynaganida, men uni “Derbi”ga jalb qilmoqchi edim, ammo bu amalga oshmay qolgandi. Doimo unga qoyil qolganman. U yanada o‘sishni istaydi, kelajakda bundan-da kuchliroq bo‘ladi deb o‘ylayman”.

Kyortis Jons (“Liverpul”)

Jons o‘zining birinchi 2019/20-yilgi mavsumida oltita o‘yinda 1 ta gol urib, jamoasining so‘nggi 30 yillikdagi ilk chempionligini qo‘lga kiritishida yordam bergandi.

19 yoshli yarim himoyachi 2020/21-yilgi mavsumdan boshlab, tez-tez va yaxshiroq o‘ynay boshladi. Aynan u “Ayaks” darvozasiga g‘alaba to‘pini kiritib, “Liverpul”ni Chempionlar Ligasi pley-off bosqichiga olib chiqdi. Shu bilan birga, u “qizillar” tarixidagi uchinchi eng yosh gol muallifiga aylandi.

Kyortis, shubhasiz, asosiy jamoaning futbolchisi. Albatta, bu hali nabiralarga aytib berishga arziydigan yutuq emas, ammo uning yoshidagi futbolchi uchun anchagina jiddiy natija hisoblanadi.