“Lokomotiv M” Jasur Jaloliddinov transferi uchun “Bunyodkor”ga 130 ming, agentlarga esa 850 ming yevro to‘lagani ma’lum bo‘ldi

O‘zbekistonlik futbolchi Jasur Jaloliddinovning “Bunyodkor”dan “Lokomotiv M”ga transferi borasida yangi tafsilotlar ma’lum bo‘ldi.

“Match TV” xabariga ko‘ra, transferni amalga oshirishda futbolchining agentlariga 850 ming yevro to‘langan. “Bunyodkor” esa 130 ming yevro miqdorida kompensatsiya olgan.

Shu tariqa agentlar uchun to‘langan miqdor transfer narxidan 654 foizga ko‘pligi ayon bo‘lmoqda.

Jaloliddinov iyul oyida “Lokomotiv” futbolchisiga aylandi. Biroq moskvaliklar yarim himoyachini Rossiya Premyer Ligasi ro‘yxatidan chiqarib yubordi va Jasur “Tambov”ga ijaraga berildi. Biroq 18 yoshli o‘yinchi “Tambov” safida ham birorta o‘yin o‘tkazmadi.

Eslatib o‘tamiz, 2020-yil iyul oyida “Bunyodkor”ning o‘sha vaqtdagi direktori Ulug‘bek Mirzayev Jasur Jaloliddinov 350 ming yevro evaziga Moskvaning “Lokomotiv” klubiga o‘tayotganini tasdiqlagandi. Orada “Chempionat” nashri “Lokomotiv” Jaloliddinov uchun 1 million yevro sarflashini, mablag‘ning 100 ming yevrosi futbolchining “Bunyodkor” bilan amaldagi shartnomasini bekor qilishga, qolgan 900 ming yevro esa Jasurning agentlariga nasib etishi haqida ma’lum qildi. 29-iyul kuni esa moskvaliklar Jasurning transferini e’lon qildi. Avgust oyi avvalida “Bunyodkor” direktori Ulug‘bek Mirzayev ishdan ketgani aytildi. Shundan so‘ng avgust oyida Professional futbol ligasi Jasur Jaloliddinov transferida shubhali jihatlar borligini e’lon qilib, O‘zbekiston futbol assotsiatsiyasiga murojaat qilgani aytildi. Ushbu murojaat natijalari tashkilot rasmiy saytlarida e’lon qilinmadi.