Iste’molchilar huquqlarini himoya qilish agentligi Yangi yil arafasida bayram sovg‘alarini to‘g‘ri tanlash bo‘yicha bir nechta maslahatlarni taqdim etdi.
Agentlik xabarida ta’kidlanishicha, tegishli hujjatlarga ega bo‘lmagan, yorliqlarida iste’molchi uchun ma’lumotlar taqdim etilmagan sovg‘alarning sotilishi man etiladi.
Sovg‘a o‘ramida iste’molchilar uchun quyidagi ma’lumotlar bo‘lishi kerak:
- oziq-ovqat mahsulotlarining nomi, ishlab chiqarilgan sanasi, saqlash muddati.
- o‘yinchoq nomi, ishlab chiqarilgan mamlakat nomi, o‘yinchoq mo‘ljallangan bolaning eng kichik yoshi, ishlab chiqarilgan sanasi.
Sovg‘alarning narxi balandligiga emas, sifatiga qarab xarid qilish, tovarlar uchun nazorat kassa chekini olishni unutmaslik lozim. Iste’molchi sotuvchidan Yangi yil sovg‘asidagi tovarlarning sifati va xavfsizligini tasdiqlovchi hujjatlarni so‘rash huquqiga ega.
Sovg‘alar agar iste’molga yaroqsiz chiqsa (yaroqlilik muddati o‘tgan, sifatsizligi aniq belgilari bilan, o‘ramining yaxlitligini buzgan holda) iste’molchi uni qaytarib berishi yoki sifatlisiga almashtirishi mumkin.
“Agar sizda Yangi yil sovg‘alarining sifati va ularni sotish paytida huquqlaringiz buzilishi haqida savollaringiz bo‘lsa, O‘zbekiston Respublikasi Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligining 1159 qisqa raqami va consumer.uz veb-saytiga murojaat qilishingiz mumkin”, — deyiladi agentlik xabarida.
Eslatib o‘tamiz, O‘zbekistonga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasining 13-dekabrdagi qarori bilan vazirlik, idoralar, davlat ulushi bo‘lgan korxonalar va boshqa xo‘jalik tashkilotlariga turli xil korporativ va ko‘ngilochar bayram tadbirlari tashkil etish taqiqlandi. Shuningdek, o‘quvchi va talabalar ishtirokida Yangi yilga bag‘ishlangan bayram tadbirlarini o‘tkazishga ham ruxsat berilmaydi. Maktablarda bayram tadbirlarini o‘tkazish maqsadida ota-onalardan turli xil noqonuniy pul yig‘imlarini yig‘ish va maktab foyesi va sinf xonalarini sun’iy archa va elektr chiroqlar bilan bezatish ham qat’iy taqiqlangan.
Maxsus komissiya fuqarolarga yangi 2021-yil bayrami tadbirlarini oila davrasida o‘tkazishni tavsiya etgan. Hududiy vakolatli organlarga esa viloyatlar, tumanlar markazlari va shaharlarda ochiq osmon ostida archalar o‘rnatish tavsiya etilgan.
Izoh (0)