Prezident Shavkat Mirziyoyev O‘zbekiston yoshlari forumiga yig‘ilgan yigit-qizlar bilan muloqot qildi. Toshkentdagi Humo Arena saroyiga kelganlar va hududlardagi ishtirokchilar o‘z fikrlarini, taklif va mulohazalarini bayon etdi. Bu haqda Prezident matbuot xizmati xabar berdi.
Davlat rahbari barcha dolzarb tashabbuslarni qo‘llab-quvvatlab, ular bo‘yicha mutasaddilarga shu yerning o‘zida ko‘rsatmalar berdi.
“Forum davomida sizlar bilan suhbatlashgan vazirlar menga savollaringni, fikrlaringni aytib berdi. Davlat idoralari rahbarlari yoshlarning muammolarini ota-ona bo‘lib, yuragidan o‘tkazib, tizimli shug‘ullanmagani haqiqat. Endi hamma rahbarlar yoshlarning ovozini eshitadi, talablarini amalga oshiradi”, — dedi Shavkat Mirziyoyev.
Prezident forum davomida bildirilgan fikrlar har tomonlama tahlil qilinib, tegishli qarorlar qabul qilinishini ta’kidladi.
“Men sizlarga bir sirimni aytaman: hududlarga borganda ko‘proq yoshlar bilan uchrashishga, ular bilan gaplashishga harakat qilaman. Chunki men sizlarday ko‘zi yongan, yuragi yongan yoshlarni izlayman. Sizlar shunga munosibsizlar”, — dedi Prezident.
Forumda Humo Arena saroyiga kelgan 3300, shuningdek, hududlardagi studiyalarda 26 ming nafardan ziyod yoshlar ishtirok etdi.
“Bugun tarixiy uchrashuvimiz. Kelinglar, bu doimiy bo‘lib qolsin. Xalqimiz mehr ko‘zda degandek, bir-birimizga mehrimiz abadiy bo‘lsin”, — deya so‘zini yakunladi Shavkat Mirziyoyev.
Forum ishtirokchilarining mamlakat yoshlariga murojaati qabul qilindi. Tadbir yakunida konsert dasturi namoyish etildi.
Mavzuga doir:
- Shavkat Mirziyoyev Toshkent shahrida zamonaviy, muhtasham kutubxona barpo etishni taklif qildi
- Xalqaro ta’lim dasturlari bo‘yicha eng yuqori ballarni to‘plagan yoshlarga imtihon topshirish xarajatlari to‘liq qoplab beriladi – Shavkat Mirziyoyev
- Shavkat Mirziyoyev 2021-yilda kamida 500 ming nafar yoshni ish bilan ta’minlashi mumkin bo‘lgan dasturni ma’qulladi
- “Yoshlar murojaati” elektron platformasi yaratiladi – Shavkat Mirziyoyev
Izoh (0)