Bosh prokuratura “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasini jamoatchilik muhokamasi uchun e’lon qildi, deb xabar bermoqda “Gazeta.uz”.
Mazkur hujjatga asosan Jinoyat kodeksini “148-3-moddasi — voyaga yetmagan shaxsni majburiy mehnatga jalb qilish” bilan to‘ldirish taklif etilmoqda.
Ushbu moddaga ko‘ra, voyaga yetmagan shaxsni uning sog‘lig‘iga, xavfsizligiga yoki axloq-odobiga ziyon yetkazishi mumkin bo‘lgan ishlarga majburiy jalb qilish — BHMning 50 baravaridan 100 baravarigacha miqdorda jarima yoki 1 yilgacha ozodlikni cheklash yoxud 1 yilgacha ozodlikdan mahrum qilish bilan jazolanadi.
O‘sha harakat voyaga yetmagan shaxsning sog‘lig‘iga o‘rtacha og‘ir shikast yetkazilishiga sabab bo‘lsa — 360 soatgacha majburiy jamoat ishlari yoki 1 yildan 3 yilgacha ozodlikni cheklash yoxud 1 yildan 3 yilgacha ozodlikdan mahrum qilish bilan jazolanadi.
O‘sha harakat voyaga yetmagan shaxsning sog‘lig‘iga og‘ir shikast yetkazilishiga yoki boshqa og‘ir oqibatlarga sabab bo‘lsa — 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanadi.
Bundan tashqari, Jinoyat kodeksining “216-1-moddasi — g‘ayriqonuniy jamoat birlashmalari va diniy tashkilotlar faoliyatida qatnashishga undash” ikkinchi qism bilan to‘ldirilmoqda: O‘sha harakatlar voyaga yetmagan shaxsga nisbatan sodir etilgan bo‘lsa — 3 yildan 5 yilgacha ozodlikni cheklash yoki 3 yildan 5 yilgacha ozodlikdan mahrum qilish bilan jazolanadi.
Mavzuga doir:
- O‘zbekistonda paxta mavsumida majburiy mehnatga yo‘l qo‘yganligi uchun beshta tuman hokimiga hayfsan e’lon qilindi
- O‘zbekistonda 2020-yilgi paxta mavsumida qancha mansabdor jazolangani ma’lum bo‘ldi
- “Namangandan shu vaqtgacha biror marta ‘gard’ chiqmagan edi”. Tanzila Norboyeva – Namangan majburiy mehnat sabab butun dunyoga “mashhur” bo‘lgani haqida
- Jizzaxda “Hududgaz” va “Hududiy elektr tarmoqlari”ning xodimlari paxta terimiga majburlangani ma’lum bo‘ldi
Izoh (0)