Истеъмолчилар ҳуқуқларини ҳимоя қилиш агентлиги Янги йил арафасида байрам совғаларини тўғри танлаш бўйича тавсиялар билан чиқди

Истеъмолчилар ҳуқуқларини ҳимоя қилиш агентлиги Янги йил арафасида байрам совғаларини тўғри танлаш бўйича бир нечта маслаҳатларни тақдим этди.

Агентлик хабарида таъкидланишича, тегишли ҳужжатларга эга бўлмаган, ёрлиқларида истеъмолчи учун маълумотлар тақдим этилмаган совғаларнинг сотилиши ман этилади.

Совға ўрамида истеъмолчилар учун қуйидаги маълумотлар бўлиши керак:

• озиқ-овқат маҳсулотларининг номи, ишлаб чиқарилган санаси, сақлаш муддати.
• ўйинчоқ номи, ишлаб чиқарилган мамлакат номи, ўйинчоқ мўлжалланган боланинг энг кичик ёши, ишлаб чиқарилган санаси.

Совғаларнинг нархи баландлигига эмас, сифатига қараб харид қилиш, товарлар учун назорат касса чекини олишни унутмаслик лозим. Истеъмолчи сотувчидан Янги йил совғасидаги товарларнинг сифати ва хавфсизлигини тасдиқловчи ҳужжатларни сўраш ҳуқуқига эга.

Совғалар агар истеъмолга яроқсиз чиқса (яроқлилик муддати ўтган, сифатсизлиги аниқ белгилари билан, ўрамининг яхлитлигини бузган ҳолда) истеъмолчи уни қайтариб бериши ёки сифатлисига алмаштириши мумкин.

«Агар сизда Янги йил совғаларининг сифати ва уларни сотиш пайтида ҳуқуқларингиз бузилиши ҳақида саволларингиз бўлса, Ўзбекистон Республикаси Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигининг 1159 қисқа рақами ва consumer.uz веб-сайтига мурожаат қилишингиз мумкин», — дейилади агентлик хабарида.

Эслатиб ўтамиз, Ўзбекистонга коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссиясининг 13 декабрдаги қарори билан вазирлик, идоралар, давлат улуши бўлган корхоналар ва бошқа хўжалик ташкилотларига турли хил корпоратив ва кўнгилочар байрам тадбирлари ташкил этиш тақиқланди. Шунингдек, ўқувчи ва талабалар иштирокида Янги йилга бағишланган байрам тадбирларини ўтказишга ҳам рухсат берилмайди. Мактабларда байрам тадбирларини ўтказиш мақсадида ота-оналардан турли хил ноқонуний пул йиғимларини йиғиш ва мактаб фоеси ва синф хоналарини сунъий арча ва электр чироқлар билан безатиш ҳам қатъий тақиқланган.

Махсус комиссия фуқароларга янги 2021 йил байрами тадбирларини оила даврасида ўтказишни тавсия этган. Ҳудудий ваколатли органларга эса вилоятлар, туманлар марказлари ва шаҳарларда очиқ осмон остида арчалар ўрнатиш тавсия этилган.