Pirotexnika vositalari va kuchli “Tropikamid” dori vositalarining noqonuniy savdosi Davlat bojxona qo‘mitasining Andijon viloyati bo‘yicha kontrabandaga qarshi va bojxona auditi boshqarmasi xodimlari tomonidan to‘xtatib qolindi. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, Bo‘ston tumanida fuqaro R.A. boshqaruvidagi Isuzu rusumli yuk avtomashinasi to‘xtatilgan va tekshiruv natijasida mato ostiga yashirilgan 288 million so‘mlik pirotexnika buyumlari topilgan.
Keyingi bojxona tekshiruvi uchun yuk mashinasi viloyat bojxona boshqarmasiga olib ketilgan va to‘liq ekspertiza davomida undan 1800 dona qiymati 450 million so‘m bo‘lgan “Tropikamid” preparati ham topilgan.
“Shunday qilib, umumiy qiymati 738 million so‘m bo‘lgan pirotexnika mahsulotlari va kuchli preparatlar noqonuniy muomaladan chiqarildi”, — deyiladi xabarda.
Avvalroq Andijon va Samarqandda noqonuniy pirotexnika vositalari savdosiga chek qo‘yilgani, Ohangaronda noqonuniy tarzda 6800 qutiga yaqin pirotexnika vositalari olib ketayotgan yuk mashinasi aniqlangani xabar berilgan edi.
Izoh (0)