Buxoro viloyatining Qorako‘l tumanidagi xalqaro matematika maktabi qurilishida o‘g‘rilikka qo‘l urgan shaxslar qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Qorako‘l xalqaro matematika maktabi binosida qurilish-ta’mirlash ishlarini olib borish uchun “Sharq plyus” MChJ tomonidan jami bahosi 48 million 160 ming so‘mlik 56 dona (860 ta qovurg‘a) isitish batareyalari olib kelingan. Biroq MChJ rahbari ularni ayni o‘rnatish jarayonida talon-torojlikka yo‘l qo‘yilgani uchun tuman IIB huzuridagi tergov bo‘linmasiga murojaat qilgan.Aniqlanishicha, qurilish ishlarini olib borayotgan shaxslarga nisbatan Jinoyat kodeksining 169-moddasi 2-qismi (o‘g‘rilik) bilan jinoyat ishi qo‘zg‘atilib, dastlabki tergov harakatlari olib borilgan.
Olib borilgan tezkor surishtiruv harakatlari davomida ushbu jinoyatni Qorako‘l tumanida yashovchi 33 yoshli Q.M. hamda Olot tumanida yashovchi A.Q., va qorako‘llik 47 yoshli G.B.lar sodir etgani ma’lum bo‘lgan.
Qorako‘l xalqaro matematika maktabida o‘g‘rilik sodir qilgan shaxslarning qilmishi fosh etilib, ashyoviy dalillar bilan qo‘lga olingan. Hozirda Qorako‘l tuman IIB huzuridagi tergov bo‘linmasi tomonidan ushbu shaxslarga nisbatan dastlabki tergov harakatlari davom ettirilmoqda.
Eslatib o‘tamiz, Qorako‘ldagi xalqaro matematika maktabining o‘quv binosi yo‘qligi sabab Prezident topshirig‘iga ko‘ra, maktabga bino qurib berish uchun 50 milliard so‘m ajratilgani va 2020-yilning noyabr oyida 85 foiz qurilish ishlari yakunlangani xabar berilgan edi.
Izoh (0)