“Har bir viloyat o‘z ayollarini himoyaga olsin”. Reabilitatsiya markazlarida ko‘chada qolgan ayollar bilan ishlanmasligi aytildi

Respublika ijtimoiy reabilitatsiya markazi direktori Muqaddam Rasulova ko‘chada qolgan hamma ayollar bilan ishlash imkoniyati yo‘qligini aytdi. “Kun.uz”ning xabar berishicha, bu haqda u O‘zbekiston Gender tenglik komissiyasining 21-dekabrdagi yig‘ilishida aytib o‘tdi.

Uning bildirishicha, zo‘ravonlikdan jabr ko‘rmasa-da, markazda qolishga urinayotgan ayollar soni ortmoqda.

“Hozirda respublika bo‘yicha 180 ta markaz faoliyat olib boryapti. Asosiy muammolardan biri shundaki, ko‘chada qolgan ayollar, jabr ko‘rmagan bo‘lsa-da bizning markazga olib kelinmoqda. Ularni qabul qilyapmiz. Chunki boradigan joyi yo‘q. Yonida ikkita farzandi bor. Lekin keyin ularni qaytarib chiqarib yuborish imkoniyati juda qiyin bo‘lyapti. Buning huquqiy asosi ham yo‘q. Yana bir og‘riqli jihat, shu paytgacha reabilitatsiya markazlarida normativ-huquqiy hujjatlar ishlab chiqilmagan.

Markazlarimizdagi ayollar orasida ruhiy xasta va tushkunlikka tushib qolganlari ko‘p uchraydi. Biz aslida faqatgina zo‘rlikdan jabr ko‘rgan ayollarni qabul qilib, ular bilan ishlashimiz kerak. Chunki ko‘chada qolgan hamma ayollar bilan ishlash imkoniyatimiz yo‘q. Surxondaryo, Qashqadaryo, Namangan va boshqa viloyatlardan bizning markazlarda ayollar yashamoqda. Ularning ikkita, uchtadan bolalari bor”, — degan Muqaddam Rasulova .

Shuningdek, reabilitatsiya markaziga kelgan ayollar uy-joy talab qilayotgani, aks holda u yerdan chiqib ketmaslikni aytib tazyiq o‘tkazishga ham harakat qilishayotganini bildirgan.

“Hozirda 32 ta koykamiz mavjud va u yerda 6-7 oylab yashayotgan ayollar bor. Chunki huquqiy hujjat qilinmagan. Buni birgalikda ko‘rib chiqib, ularni chiqarib yuborish bo‘yicha ichki ishlar organlaridan yordam so‘rayapmiz. Hamma viloyatlar o‘zlarining ayollarini himoyaga olsin. Vakillari kelib olib ketishsin”, — degan markaz rahbari.

“Kuni kecha Surxondaryodan bir ayolni olib kelishdi. Uning 3 nafar farzandi erida qolgan. Biz 3 kun muddatga deb qabul qilib oldik. Lekin hozir ‘men ketmayman, ishlayman, shu yerda qolaman’, deyapti. Ular tushkunlikka tushib qolgan ayollar hisoblanadi”, — degan Muqaddam Rasulova.

Ma’lum qilinishicha, 2020-yilning o‘tgan 11 oyi davomida ichki ishlar organlari tomonidan turli tazyiq va zo‘ravonliklarga uchragan 11 ming 138 nafar xotin-qizga himoya orderi berilgan. Ularning 9 ming 916 nafari (89 foiz) oilada tazyiq va zo‘ravonlikka uchragan, 5 ming 418 nafariga nisbatan esa jismoniy zo‘ravonlik sodir etilgan. Shuning natijasida 652 ta oila ajrashib ketgan.