Futbol bo‘yicha Angliya Premyer Ligasining 15-turida “Manchester Yunayted” 26-dekabr, shanba kuni “Lester” maydonida mehmon bo‘ldi.
Uchrashuvni har ikki tomon vakillari faol hujumlar ostida boshladi. 23-daqiqada kelib mehmonlar oldinga o‘tib oldi: Brunu Fernandeshing uzatmasidan keyin Markus Reshford darvozani aniq nishonga oldi.
Bunga maydon egalari 31-daqiqada Harvi Barnsning chiroyli goli bilan javob qaytardi. Birinchi bo‘limda boshqa gol bo‘lmadi.
Ikkinchi bo‘limda ustunlik “qizil iblislar” tomonida bo‘ldi. Qator hujumlar 79-daqiqaga borib o‘z samarasini berdi. Zaxiradan maydonga tushganiga ko‘p bo‘lmagan Edinson Kavani o‘zining uzatmasi bilan Fernandeshni qulay imkoniyatga olib chiqdi, portugaliyalik futbolchi esa bu imkoniyatni ko‘kka sovurmadi.
Goldan keyin faollikni oshirgan “tulkilar” 85-daqiqada Jeymi Vardining goli bilan yana hisobni tenglashtirdi. Qolgan vaqtda hisob o‘zgarmadi.
“Lester” 28 ochko bilan 2-o‘rinda qoldi, bitta zaxira o‘yiniga ega “Manchester Yunayted” (27) esa hozircha uchinchi pog‘onani band etgan.
“Lester” — “Manchester Yunayted” uchrashuvidagi gollarni bu yerda ko‘rish mumkin — video.
APL
15-tur bahsi
26-dekabr, shanba
“Lester” — “Manchester Yunayted” 2:2
Gollar: 0:1 – 23 Reshford, 1:1 – 31 Barns, 1:2 – 79 Brunu Fernandesh, 2:2 – 85 Vardi.“Lester”: Shmeyhel, Evans, Jastin, Kastan, Fofana, Tilemans, Olbrayton (Peres, 81), Ndidi, Meddison, Barns, Vardi.
“Manchester Yunayted”: De Xea, Maguayr, Bayi, Lindelyof (Tuanzebe, 66), Shou, Maktominey, Brunu Fernandesh, Fred, Jeyms (Pogba, 54), Marsyal (Kavani, 75), Reshford.
Ogohlantirishlar: Brunu Fernandesh (45), Meddison (54), Ndidi (89).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)