“O‘layotganim va bir oylik umrim qolgani haqida yozishdi”. Jennaro Gattuzoga nimalar bo‘lmoqda?

So‘nggi haftalarda Italiyaning “Napoli” klubi bosh murabbiyi Jennaro Gattuzo jamoani ko‘zini bog‘lab olgan holda boshqarmoqda. A Seriya 14-turidan o‘rin olgan “Torino”ga qarshi o‘yindan so‘ng esa italiyalik mutaxassis sog‘lig‘ida muammolar borligini tan olishga jur’at etdi.

“Menda autoimmun xastalik mavjud, bu ko‘z miasteniyasi, — dedi Gattuzo ko‘zidagi bog‘ichni yechib. — So‘nggi 10 kun ichida men o‘zimda emasdim. Bunday holatda o‘zingizni butunlay tamom bo‘lgandek his qilasiz. Kuniga 24 soat ko‘rish borasidagi muammolar juda charchatadi. Faqat men kabi tentak shu holatda ham ishlashda davom etishi mumkin.

Hozir oynaga qaraganida o‘z kamchiligini ko‘radiganlar, ayniqsa, bolalarga murojaat qilmoqchiman: xavotir olmang, hayot juda go‘zaldir. Va siz uning yuziga qo‘rqmasdan tik qaray olishingiz kerak.

Garchi buni jamoa o‘yinchilaridan yashirishga harakat qilgan bo‘lsam-da, ular bu holimdan xavotirga tushdi. O‘zim bilan qattiq olishdim. Odamlar meni bunday holatda ko‘rayotganidan ham o‘zimda emasman. Biroq uni qabul qilish kerak, chunki hayotda bundan-da yomonroq vaziyatlar bo‘lishi mumkin.

Hatto bir oy umrim qolgani haqida mish-mishlarni eshitdim, nima bo‘lgan taqdirda ham hali tirikman va ishonchingiz komil bo‘lsinki, o‘lmayman. Bu xastalik bilan 10 yildan beri yashab kelaman, u menga uchinchi marta hamla qilmoqda va bu safargisi kuchli zarba bo‘ldi. Albatta, hammasi ortda qoladi va men yana o‘z holimga qaytaman. Bunday ko‘rinish o‘zimga ham yoqimsiz tuyilmoqda, biroq bu o‘tib ketadi“.

Xo‘sh, qanday kasallik o‘zi bu?

Miasteniya — autoimmun xastalik bo‘lib, unda qovoq mushaklari zaiflashishi, ko‘zoldi tasvirining xiralashishi, talaffuzdagi buzilishlar, chaynov mushaklarining sustlashishi, yutinishning qiyinlashishi, bo‘yinda og‘irlik, qo‘l-oyoqlarning kuchsizlanishi kabi belgilar bilan kechadi.

Gattuzo 10 yildan beri kasallikdan aziyat chekib keladi

Rinoda ushbu xastalik 10 yil oldin aniqlangan. U o‘sha vaqtlar futbolchi sifatida “Milan” sharafini himoya qilardi. Ma’lumotlariga ko‘ra Jennaro 2011/2012-yilgi mavsumda aynan optik asab falaji tufayli 309 kunni o‘tkazib yuborgan.

“Chap ko‘zimda ko‘rish bilan bog‘liq muammolar bor. Shifokorlar hozircha operatsiya qilishni tavsiya etmayapti, bunga ehtiyoj bor yo yo‘qligini aniq aytish uchun olti oy kutish kerak. Ammo yaxshi tomonga o‘zgarish bor. Avvaliga to‘rtta Ibragimovichni ko‘rayotgandim, keyin uchta, hozir esa ko‘zim ularning ikkitasini ko‘rmoqda”, — degandi o‘shanda Jennaro.

Shifokorlar Gattuzoning qanday kasallikdan aziyat chekayotganini aniqlash uchun uzoq vaqt davomida bosh qotirdi. Faqatgina bir yil o‘tgach aniq tashxis qo‘yildi — ko‘z miasteniyasi.

Navbatdagi hamla esa Yevropa Ligasi guruh bosqichidan o‘rin olgan “Real Sosyedad”ga qarshi o‘yin vaqtida ro‘y berdi. Mutaxassis o‘yinni bog‘langan ko‘z bilan yakunladi. Gattuzo matbuot anjumaniga ham kelmadi — kela olmadi.

Xurujdan keyin kasallikka qarshi kurashish uchun italiyalik o‘ng ko‘ziga himoya ko‘zoynagi va bog‘ich taqishni boshladi. “Torino”ga qarshi o‘yindan so‘ng esa Gattuzo ularni yechib, futbol olamiga qovoqlarining shishib ketganini ko‘rsatdi: yumshoqroq qilib aytganda, ushbu holatda Jennaroni ko‘rkam deyish biroz mushkul edi.

Biroz bo‘lsa-da, xursand qiladigan jihat shuki, Rino aniq tushkunlikka tushib qoladigan inson emas. U har doim jangchi bo‘lib kelgan.

Bardam bo‘l, mister!