O‘zbekiston mustaqilligining 30 yilligi munosabati bilan (2021-yilning avgust oxiri) Samarqand shahrida BRT (bus rapid transit) — alohida tezyurar avtobus liniyasini ishga tushirish rejalashtirilmoqda. Bu haqda Zarnews xabar berdi.
Samarqand viloyati transport boshqarmasi boshlig‘i o‘rinbosari Jo‘rabek Qorjovovning ta’kidlashicha, loyiha O‘zbekiston Prezidentining topshirig‘iga ko‘ra, xorijlik mutaxassislar bilan hamkorlikda ishlab chiqilmoqda.
Liniya “Xazora” avtostansiyasidan “Siyob” avtostansiyasiga qadar bo‘lgan, taxminan, 12 kilometrni o‘z ichiga oladi. U Spitamen, Mirzo Ulug‘bek ko‘chalari, Universitet bulvari, Registon maydoni va Panjikent ko‘chasi bo‘ylab harakatlanadi.
Mazkur liniya xuddi tramvay liniyalari kabi ko‘chaning o‘rtasida joylashadi, binolarni buzish rejada yo‘q. Hozirda bekatlar uchun optimal joylarni belgilash maqsadida yo‘lovchilar oqimi o‘rganilmoqda.
Yangi liniya uchun Xitoydan 24 ta avtobus (uzunligi 16 metr keladigan) xarid qilish rejalashtirilgan. Shu bilan birga, yangiliklarda 100 ta avtobus sotib olish rejalashtirilganligi eslatib o‘tilgan. So‘nggi yillarda viloyatlarda jamoat transporti asosan o‘rta rusumli avtobuslar va marshrut taksilaridan iborat bo‘lib qolgan.
Avvalroq xorijiy konsultantlar tomonidan Toshkentning 3 ta yo‘nalishi — “Chilonzor buyum bozori”, “Chorsu” savdo markazi va TTZ yo‘nalishlarida BRT tezyurar avtobus xizmati yo‘lga qo‘yish taklif etilayotgani to‘g‘risida xabar berilgandi. Loyiha noyabr oyida Prezident Shavkat Mirziyoyevga taqdim etilgan va ma’qullangan. Liniyalar sobiq tramvay marshrutlari bo‘ylab joylashadi.
Mavzuga doir:
Izoh (0)