Ўзбекистон мустақиллигининг 30 йиллиги муносабати билан (2021 йилнинг август охири) Самарқанд шаҳрида BRT (bus rapid transit) — алоҳида тезюрар автобус линиясини ишга тушириш режалаштирилмоқда. Бу ҳақда Zarnews хабар берди.
Самарқанд вилояти транспорт бошқармаси бошлиғи ўринбосари Жўрабек Қоржововнинг таъкидлашича, лойиҳа Ўзбекистон Президентининг топшириғига кўра, хорижлик мутахассислар билан ҳамкорликда ишлаб чиқилмоқда.
Линия «Хазора» автостанциясидан «Сиёб» автостанциясига қадар бўлган, тахминан, 12 километрни ўз ичига олади. У Спитамен, Мирзо Улуғбек кўчалари, Университет бульвари, Регистон майдони ва Панжикент кўчаси бўйлаб ҳаракатланади.
Мазкур линия худди трамвай линиялари каби кўчанинг ўртасида жойлашади, биноларни бузиш режада йўқ. Ҳозирда бекатлар учун оптимал жойларни белгилаш мақсадида йўловчилар оқими ўрганилмоқда.
Янги линия учун Хитойдан 24 та автобус (узунлиги 16 метр келадиган) харид қилиш режалаштирилган. Шу билан бирга, янгиликларда 100 та автобус сотиб олиш режалаштирилганлиги эслатиб ўтилган. Сўнгги йилларда вилоятларда жамоат транспорти асосан ўрта русумли автобуслар ва маршрут таксиларидан иборат бўлиб қолган.
Аввалроқ хорижий консультантлар томонидан Тошкентнинг 3 та йўналиши — «Чилонзор буюм бозори», «Чорсу» савдо маркази ва ТТЗ йўналишларида БРТ тезюрар автобус хизмати йўлга қўйиш таклиф этилаётгани тўғрисида хабар берилганди. Лойиҳа ноябрь ойида Президент Шавкат Мирзиёевга тақдим этилган ва маъқулланган. Линиялар собиқ трамвай маршрутлари бўйлаб жойлашади.
Маълумот учун, Самарқанд Ўзбекистондаги трамвайлар ҳаракатланадиган ягона шаҳар ҳисобланади. Самарқандда трамвай тизими 1947 йилдан 1973 йилгача фаолият кўрсатган. 2016 йил майида эса Тошкентда 100 йилдан ортиқ ишлаган трамвай ҳаракати тўхтатилди. Пойтахтдаги вагонлар Самарқандга етказиб берилганди.
Изоҳ (0)