Косонда икки оила ўртасида юз берган жанжал ўғлини ҳимоя қилган отанинг ўлимига сабаб бўлди

Қашқадарё вилояти Косон туманида икки оила эркаклари ўртасида юз берган жанжал улардан бирининг бошлиғи ўлимига олиб келди. Бу ҳақда Ички ишлар вазирлиги ҳузуридаги Тергов департаменти хабар берди.

Қашқадарё вилояти Косон тумани «Пахтазор» МФЙда жойлашган озиқ-овқат маҳсулотлари бозорчаси ёнида 2020 йилнинг 22 ноябрь куни соат 16:00 да Ҳусниддин Р. 24 ёшли Миролим Б.ни кўриб қолиб, ўрталарида бўлган ўзаро адоват сабабли ундан қасд олиш мақсадида ушбу жанжалга акалари — 22 ёшли Рухиддин Р., Озодбек Р. ва бошқаларни жалб қилган.

Бундан хабар топган Миролим Б. ўзининг яқин қариндошларини ёрдамга чақирган. Миролим Б.га бирон-бир зиён етмаслиги учун ҳодиса жойига етиб келган отаси, 57 ёшли Маҳмуд М., 27 ёшли акаси Миржалол Б. ва поччаси 35 ёшли Жамшид М. ушбу жанжалнинг олдини олиб, бартараф қилмоқчи бўлган.

Бироқ Ҳусниддин Р., Рухиддин Р., Озодбек Р. ва бошқалар бир гуруҳ бўлиб, совуқ қурол сифатида фойдаланиш мумкин бўлган ашёларни ишлатиб, Миролим Б.ни ҳимоя қилиб, жанжалнинг олдини олмоқчи бўлган фуқаро Маҳмуд М., шунингдек, унинг ўғиллари Миржалол Б., Миролим Б. ва Жамшид М.нинг турли жойларига қасддан уриб, турли даражада тан жароҳатлари етказган.

Оқибатда Маҳмуд М., Миржалол Б., Миролим Б. ва Жамшид М. турли даражадаги тан жароҳатлари билан Косон тумани тиббиёт бирлашмасига мурожаат қилган. Шифохонада кўрсатилган тиббий муолажаларга қарамасдан, фуқаро Маҳмуд М. олган тан жароҳати сабабли 11 декабрь куни вафот этган.

Дастлаб мазкур ҳолат юзасидан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.

Дастлабки тергов жараёнида 8 декабрь куни Ҳусниддин Р., Озодбек Р., ва Рухиддин Р.га нисбатан Жиноят кодексининг 104-моддаси 2-қисми «б», «к», «л» бандлари (бир гуруҳ бўлиб, совуқ қурол сифатида фойдаланиш мумкин бўлган ашёларни ишлатиб, ўз хизмат ёки фуқаролик бурчини бажариб, яқин қариндоши бўлган шахсга нисбатан қасддан баданга оғир шикаст етказиш) билан айблов эълон қилиниб, Ҳусниддин Р., Озодбек Р.га нисбатан қамоққа олиш тарзидаги, фуқаро Рухиддин Р.га нисбатан эса гаров эҳтиёт чораси қўлланилган.

Фуқаро Маҳмуд М. олган тан жароҳати сабабли 11 декабрь куни вафот этгач, жиноят иши Жиноят кодексининг 104-моддаси 2-қисми «б», «к», «л» бандларидан 104-модданинг 3-қисми «д» бандига (жабрланувчининг ўлимига сабаб бўлган қасддан баданга оғир шикаст етказиш) қайта малакаланган. Ҳозирда жиноят иши бўйича тергов ҳаракатлари давом эттирилмоқда.