Turizmni rivojlantirish davlat qo‘mitasi raisi Aziz Abduhakimov “Al-Buxoriy” xalqaro sun’iy yo‘ldosh telekanalini ochishni taklif etdi. Bu haqda qo‘mita matbuot xizmati xabar berdi.
23-dekabr kuni O‘zbekiston xalqaro islom akademiyasida ziyorat turizmini rivojlantirish hamda ushbu yo‘nalishdagi mutaxassislarni tayyorlash masalalariga bag‘ishlangan yig‘ilish bo‘lib o‘tgan. Unda ishtirok etgan Aziz Abduhakimov “Al-Buxoriy” xalqaro sun’iy yo‘ldosh telekanalini ochish va unda musulmon aholisi ko‘p bo‘lgan mamlakatlar tillarida O‘zbekistonning ziyorat turizmi salohiyatini namoyish qilib, targ‘ibot kampaniyasini kuchaytirishni, shuningdek, innovatsion muzey hamda Ziyorat turizmi markazi tashkil qilishni taklif etgan.
U, shuningdek, O‘zbekiston ziyorat turizmi sohasida erishilayotgan yutuqlarga ham to‘xtalib o‘tgan.
“2018−2019-yillarda vizasiz rejim joriy etilgan Indoneziyadan tashrif buyuruvchi sayyohlar oqimi — 170 foizga, Malayziyadan — 158 foizga, Turkiyadan — 154 foizga, BAAdan keluvchi musulmon sayyohlar soni 153 foizga oshdi. Shunisi diqqatga sazovorki, Jahon musulmon sayyohlari indeksi (Global Muslim Travel Index) reytingida O‘zbekiston 10 pog‘ona (32-o‘rindan 22-o‘ringa) yuqorilab, Islom hamkorlik tashkilotiga a’zo mamlakatlar orasida musulmon sayyohlarni jalb qilayotgan eng jozibador hamda xavfsizlik va bag‘rikenglik darajasi yuqori bo‘lgan 10 mamlakat qatoridan o‘rin oldi. Shu bilan birga, mamlakatimiz Halal Travel Frontier 2020 hisobotida islomiy merosni qayta tiklash orqali musulmonlar turizmi bozorida yangi trendga asos solgan mamlakat sifatida e’tirof etildi”, — degan Abduhakimov.
Avvalroq Aziz Abduhakimov bugungi kunda mehmonxonalar faoliyatini jonlantirishi mumkin bo‘lgan ziyorat turizmini rivojlantirishga oid loyihalar ishlab chiqilayotganini aytgandi.
Izoh (0)