Rossiyada bir sutkada rekord darajada — 29 935 ta COVID-19 holati aniqlandi. Moskvada 8203 kishi kasallandi, bu ham rekord ko‘rsatkich

Rossiyada so‘nggi sutkada 29 935 kishida COVID-19 aniqlanib, pandemiya boshidan buyon kasallanganlar soni ortishi bo‘yicha rekord bo‘ldi, deb xabar bermoqda Meduza. Avvalgi rekord — 29 350 ta holat 21-dekabrda qayd etilgandi.

Yangi kasallanish holatlarining eng ko‘pi — 8203 ta holat Moskvada qayd etilgan bo‘lib, shahardagi sutkalik rekorddir. Undan keyingi o‘rinlarni Sankt-Peterburg (3 756 ta) va Moskva viloyati (1538 ta) egallagan.

Mamlakatda pandemiya boshidan buyon 2 963 688 kishi kasallangan, 2 370 857 nafari sog‘aygan, shu jumladan, bemorlarning 28 990 nafari so‘nggi bir kecha-kunduzda tuzalib chiqqan.

Shuningdek, so‘nggi sutkada koronavirusdan 635 kishi, pandemiya boshidan buyon esa, operativ shtab ma’lumotlariga ko‘ra, 53 096 kishi vafot etgan.

Dekabr oyidan boshlab Rossiyaning barcha hududlarida koronavirusga qarshi emlash boshlandi. “Rospotrebnadzor” rahbari Anna Popova Rossiyada COVID-19 pandemiyasi bahorda tugashini taxmin qilgan. “Agar biz harakat qilsak, undan ham avval tugashi mumkin. Bu hammamizga bog‘liq”, — degan edi u.