Россияда сўнгги суткада 29 935 кишида COVID-19 аниқланиб, пандемия бошидан буён касалланганлар сони ортиши бўйича рекорд бўлди, деб хабар бермоқда Meduza. Аввалги рекорд — 29 350 та ҳолат 21 декабрда қайд этилганди.
Янги касалланиш ҳолатларининг энг кўпи — 8203 та ҳолат Москвада қайд этилган бўлиб, шаҳардаги суткалик рекорддир. Ундан кейинги ўринларни Санкт-Петербург (3 756 та) ва Москва вилояти (1538 та) эгаллаган.
Мамлакатда пандемия бошидан буён 2 963 688 киши касалланган, 2 370 857 нафари соғайган, шу жумладан, беморларнинг 28 990 нафари сўнгги бир кеча-кундузда тузалиб чиққан.
Шунингдек, сўнгги суткада коронавирусдан 635 киши, пандемия бошидан буён эса, оператив штаб маълумотларига кўра, 53 096 киши вафот этган.
Декабрь ойидан бошлаб Россиянинг барча ҳудудларида коронавирусга қарши эмлаш бошланди. «Роспотребнадзор» раҳбари Анна Попова Россияда COVID-19 пандемияси баҳорда тугашини тахмин қилган. «Агар биз ҳаракат қилсак, ундан ҳам аввал тугаши мумкин. Бу ҳаммамизга боғлиқ», — деган эди у.
Изоҳ (0)