Nyu-Yorkda tibbiy xodimlardan biri Amerikaning Pfizer kompaniyasi ishlab chiqargan koronavirusga qarshi vaksina bilan emlanganidan keyin kuchli allergik reaksiyani boshidan o‘tkazdi, deb yozadi “RBK”.
Newsweek gazetasi o‘z manbalariga tayanib xabar berishicha, hodisadan keyin tibbiy xodim kasalxonaga yotqizilgan. Ayni paytda uning ahvoli barqaror deb baholanmoqda.
Nashr hamsuhbatlari ma’lum qilishicha, bu Nyu-Yorkda ushbu doriga nisbatan aniqlangan birinchi allergik reaksiyadir. Vaksinatsiya qayerda va qachon amalga oshirilgani aytilmayapti.
“Vaksinalar, haqiqatan ham, ikkilamchi ta’sirlarga va allergik reaksiyalarga ega, ular kam uchrasa-da, yuz berishi mumkin. Biz shuni ham bilamizki, klinik sinovlar va boshqa yurisdiksiyalarda ikkilamchi ta’sirlar haqidagi xabarlarga asoslanganda, Pfizer vaksinasi bilan bog‘liq bunday reaksiyalar kam bo‘lsa-da, ro‘yxatga olingan”, — deyiladi Nyu-York Sog‘liqni saqlash va ruhiy gigiyena departamenti bayonotida.
Muassasa tibbiy xodimlarga bemorlar emlanganidan keyin 15 daqiqa davomida ularning organizmi vaksinaga qanday reaksiya ko‘rsatishini kuzatib turishni maslahat berdi. Ilgari allergik reaksiyalarni boshdan kechirgan bemorlarni emlaganda esa 30 daqiqa kuzatuv olib borish tavsiya etildi.
Avvalroq AQShning Alyaska shtati Juno shahridagi Bartlett mintaqaviy kasalxonasida Pfizer va BioNTech kompaniyalarining koronavirusga qarshi vaksinasi bilan emlangan ikki nafar tibbiyot xodimining mazasi qochgan edi.
Eslatib o‘tamiz, AQShda 14-dekabr kuni koronavirusga qarshi emlash boshlandi. Birinchi navbatda kasallanganlar bilan ishlayotgan tibbiyot xodimlari emlanmoqda. Kasalliklar nazorati va profilaktikasi markazlari (CDC) ma’lumotlariga ko‘ra, 2020-yil oxirigacha Amerika hukumati 40 million kishini emlashni rejalashtirmoqda.
2-dekabr kuni Buyuk Britaniya dunyoda birinchi bo‘lib Pfizer’ning koronavirusga qarshi vaksinasidan foydalanishni ma’qullagan edi. Shundan keyin Britaniya dunyoda birinchi bo‘lib koronavirusga qarshi vaksinatsiyani boshlashi xabar berildi. Vaksinatsiyaning birinchi kunida ilgari allergiyasi bo‘lgan ikki tibbiyot xodimida anafilaktik reaksiya kuzatilgach, hukumat oldindan jiddiy allergiyasi bo‘lganlarni Pfizer va BioNTech vaksinasi bilan emlashni taqiqlab qo‘ydi.
Izoh (0)