AQSh Rossiyani Navalniyning zaharlanishi borasida fitna nazariyalarini yaratishda aybladi. AQSh yangi sanksiyalarni tayyorlayotgani xabar berildi

AQSh Davlat departamenti Rossiya FXX (Federal xavfsizlik xizmati) xodimlarini rossiyalik siyosatchi Aleksey Navalniyni “Novichok” guruhidagi zahar yordamida zaharlaganlikda aybladi. Bu haqda Davlat departamenti vakili CNN’ga bergan intervyusida aytib o‘tdi, deb yozadi Meduza.

“AQSh fikricha, Rossiya FXX xodimlari janob Navalniyni zaharlash uchun ‘Novichok’ asab-falajlik moddasidan foydalangan. Janob Navalniyning zaharlanishini Rossiya hukumatining ishtirokidan boshqa haqiqatga yaqin izohi yo‘q. Albatta, prezident Putin va Rossiya hukumati bizning boshqacha o‘ylashimizni xohlaydi”, — dedi u.

Davlat departamenti vakili aytishicha, Rossiyaning Aleksey Navalniyning zaharlanishi haqidagi savollarga javob bera olmasligi ko‘p narsani anglatadi.

“Rossiya ko‘plab, asosan bir-biriga zid bo‘lgan fitna nazariyalarini ilgari surdi. Keling, ochiqchasiga gaplashamiz: bunday fitna nazariyalari Rossiya hukumati oldida turgan va hali javobini kutayotgan jiddiy savollardan e’tiborni chalg‘itish usulidan boshqa narsa emas”, — deya ta’kidladi u.

CNN Davlat departamenti bayonotini Donald Tramp ma’muriyatining Navalniyning zaharlanishi haqidagi eng qat’iy izohi deb atamoqda. Telekanal rossiyalik muxolifatchi bilan bog‘liq hodisa yuzasidan idoraga oldinroq bir necha marta so‘rovlar jo‘natgan edi.

Davlat departamenti Rossiya hodisa uchun javobgarlikka tortilmagani sababi, shuningdek, idora nima uchun avvalroq bayonot bermagani haqidagi savollarga javob bermadi.

CNN’ning ikki manbasi ma’lum qilishicha, AQSh Aleksey Navalniyning zaharlanishi tufayli Rossiyaga nisbatan sanksiyalarni tayyorlab qo‘ygan, ammo ularni kiritish uchun butun hukumat va Donald Trampning tasdig‘i kerak, u esa bungacha muxolifatchining zaharlanishida Rossiyani bevosita ayblamagan edi.

14-dekabr kuni Navalniyning zaharlangani bo‘yicha The Insider, Bellingcat va CNN’ning Der Spiegel ishtirokida hamkorlikda o‘tkazilgan tekshiruv natijalari e’lon qilindi. Tergov mualliflari siyosatchiga suiqasd Tomskda FXX kriminalistika instituti niqobi ostida harakat qilgan FXX maxfiy bo‘limining sakkiz nafar tezkor xodimi tomonidan amalga oshirilgan, degan xulosaga keldi. Tergov hujjatida suiqasd tafsilotlari ham, unda ishtirok etgan FXX xodimlarining ism-shariflari ham oshkor qilindi, ulardan biri Konstantin Kudryavsev bo‘lib chiqdi.

Aleksey Navalniyning iddaolari ortidan Vladimir Putin ham voqeaga o‘z munosabatini bildirdi.

“Berlin klinikasidagi o‘sha bemorga kelsak, men ko‘p marta aytganman, faqat ba’zi narsalarni takrorlashim mumkin. Kecha Peskov menga bu haqdagi so‘nggi uydirmalar va bizning maxsus xizmatchilarimiz ma’lumoti haqida xabar berdi. Bu qandaydir tergov emas, bu Amerika maxsus xizmatlarining materiallarini legallashtirish. Bizning maxsus xizmatlarimiz buni biladi va ma’qul topsa, telefondan foydalanadi”, — dedi u. Putinning fikricha, “Berlin klinikasidagi bemor” Amerika maxsus xizmatlari ko‘magidan foydalanadi, Rossiya maxsus xizmat xodimlariga esa uni o‘ldirishga hojat yo‘q edi.

21-dekabr kuni rossiyalik siyosatchi Aleksey Navalniy “Men o‘z qotilimga telefon qildim. U tan oldi” nomli videorolikni e’lon qildi. Videoda Navalniyning aytishicha, u o‘zining zaharlanishi ortida Federal xavfsizlik xizmatining guruhi turgani haqidagi surishtiruvni e’lon qilishdan oldin guruh a’zolaridan biri — Konstantin Kudryavsev bilan gaplashgan va Kudryavsev Navalniyni o‘ldirishga harakat qilinganini tasdiqlagan.