Buyuk Britaniyada aniqlangan koronavirusning yangi, yuqumli turi, kasallikni davolash uchun ishlatiladigan preparatlar ta’sirida paydo bo‘lgan bo‘lishi mumkin. Bu haqda Jorj Meyson universitetining tizimli biologiya maktabi professori Ancha Baranova ma’lum qildi, deb xabar bermoqda “RBK”.
“Ushbu shtammning paydo bo‘lishi koronavirusni yo‘q qilish bo‘yicha terapevtik harakatlarimiz natijasidir”, — degan Baranova. Uning aytishicha, ushbu virus shtammini o‘rganish bo‘yicha o‘tkazilgan dastlabki tadqiqotlar u nafaqat yuqumliroq ekanini, balki ushbu shtamm evolyutsiyasi uzoq vaqt immunosupressiya va immunitetni bostirish ta’siriga uchragan organizmda sodir bo‘lganini ko‘rsatdi.
Uning aytishicha, koronavirusni davolash paytida qo‘llaniladigan immunosupressiv dorilar organizmda virus bo‘lishi davomiyligini oshirib, uning mutatsiyasiga turtki bo‘ladi.
Baranova virusning yangi populyatsiyalari yuzaga kelishiga olib kelishi mumkin bo‘lgan boshqa davolash usullari qatorida COVID-19’ga chalinib chiqqan kishining ko‘p miqdorda SARS-CoV-2 antitanalari bo‘lgan qon plazmasini quyishni ham qayd etib o‘tgan.
Mutaxassisning fikricha, virus mutatsiyasi paydo bo‘lish tezligiga virusli polimerazgsa ta’sir ko‘rsatadigan preparatlar ta’sir qilishi mumkin. Masalan, “Areplivir” va “Coronavir” yoki Buyuk Britaniyada COVID-19’ni davolash protokollarida qo‘llaniladigan “Remsedivir”.
“Bu bizning odamlar hayotini saqlab qolish bo‘yicha harakatlarimizning natijasidir. Biz baribir odamlar hayotini saqlab qolishda davom etamiz. Bu esa bizda virus turlari paydo muntazam ravishda paydo bo‘lishda davom etishini bildiradi”, — degan ekspert va Buyuk Britaniya bilan chegarani yopish befoyda ekanligini ta’kidlab o‘tgan.
Koronavirusning yangi turiga qarshi kurash maqsadida chegalarni yopish befoyda ekanligi haqidagi fikrga DiaPrep System Inc tibbiy tadqiqot kompaniyasi rahbari, epidemiolog Mixail Favorov ham qo‘shilgan.
“Agar virus [COVID-19’ning] og‘ir shakliga olib kelmasa, lekin yuquvchanlik darajasi yuqori bo‘lsa, ko‘proq odamlar kasallanib chiqadi. Pandemiyani tugatish uchun zarur bo‘lgan ommaviy immunitet shakllanadi. Shu sababli yuqumli, ammo unchalik og‘ir bo‘lmagan virusni cheklashning nima keragi borligini, to‘g‘risini aytganda, unchalik tushunmadim”, — degan u. Favorovning aytishicha, virus sentabrdan beri tarqalgan, ammo cheklovlar endi keskinlashtirildi.
Shuningdek, epidemiologninh tushuntirishicha, patogen uchun yuqori yuquvchanlik va kasallikning yengil o‘tishi “foydali”. Chunki odam kasallik tufayli vafot etsa, virus ham bemor bilan birga o‘ladi.
Eslatib o‘tamiz, Buyuk Britaniyada koronavirusning yangi varianti o‘tgan haftada aniqlangandi. Dastlabki ma’lumotlarga ko‘ra, u odatdagi koronavirusdan 70 foizga yuqumliroq, lekin undan xavfliroq emas. JSST 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Braziliyada ham koronavirusning yangi mutatsiyalari aniqlandi. Shu munosabat bilan 20 dan ortiq mamlakat Buyuk Britaniya bilan aviaqatnovlarga cheklovlar kiritdi, shu jumladan O‘zbekiston ham.
Izoh (0)