Navoiy viloyati hokimi Qobul Tursunov 23-dekabr, chorshanba kuni “Yoshlar festivali” doirasida Yoshlar parlamenti a’zolari, viloyat sardorlar kengashi vakillari, yoshlar yetakchilari hamda O‘zbekiston yoshlar ittifoqida faoliyat yuritayotgan bir guruh ko‘ngillilar bilan uchrashdi. Bu haqda viloyat hokimligi matbuot xizmati xabar berdi.

“Ular hokimlikning barcha mas’uliyati, og‘ir-yengilini to‘la his etishlari uchun hokim o‘rnida ‘topshiriqlar’ berishga ham ruxsat etildi”, — deyiladi xabarda.

“Kuchli davlat ortida doim salohiyatli, yuqori saviyali insonlar turadi”, — deydi hokim yoshlar bilan uchrashuvda. Qobul Tursunov O‘zbekiston Prezidenti tomonidan qo‘yilgan asosiy vazifalardan biri yoshlarni bilimli, salohiyatli, dunyoqarashi keng insonlar bo‘lib yetishishini ta’minlashdan iborat ekanligini ta’kidlagan.

Hokimlik matbuot xizmatining ma’lum qilishicha, Qobul Turnusov uchrashuvda yoshlarning savollariga javob qaytargan.

Eslatib o‘tamiz, 2020-yilning yanvar oyida Andijonda yoshlar 10 kun davomida shaharlar va tumanlar hokimlari, hokim o‘rinbosarlari lavozimlarini egallagan edi.