O‘zbekistonda 2020-yilgi “Prezident archasi” tadbirlari COVID-2019 virusi bilan bog‘liq vaziyatni inobatga olgan holda bolalar sog‘lig‘ini asrash maqsadida karantin talablariga qat’iy rioya etgan holda tashkil etiladi. Bu haqda XTV matbuot xizmati xabar berdi.
Qayd etilishicha, “Tomosha” bolalar teatr-studiyasi tomonidan tayyorlangan “Prezident archasi” bayram dasturi tomoshabinlarsiz O‘zbekiston milliy teleradiokompaniyasi tomonidan tasvirga olinadi hamda “Bolajon”, “Yoshlar” telekanallari tomonidan tashkil etiladigan Yangi yil telemarafoni doirasida namoyish etiladi.
Bugungi kunda Mehribonlik uylari tarbiyalanuvchilari, ota-ona qarovisiz qolgan bolalar, ota-onalari vatan sarhadlarini himoya qilish yo‘lida qurbon bo‘lgan bolalar hamda ijtimoiy himoyaga muhtoj oilalarning 3-15 yoshdagi farzandlari uchun 11 000 dona “Prezident sovg‘asi” hozirlanmoqda. Sovg‘alar 28—30-dekabr kunlari barcha hududlarga yetkazib beriladi.
Eslatib o‘tamiz, O‘zbekistonga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasining 13-dekabrdagi qarori bilan vazirlik, idoralar, davlat ulushi bo‘lgan korxonalar va boshqa xo‘jalik tashkilotlariga turli xil korporativ va ko‘ngilochar bayram tadbirlari tashkil etish taqiqlandi. Shuningdek, o‘quvchi va talabalar ishtirokida Yangi yilga bag‘ishlangan bayram tadbirlarini o‘tkazishga ham ruxsat berilmaydi. Maktablarda bayram tadbirlarini o‘tkazish maqsadida ota-onalardan turli xil noqonuniy pul yig‘imlarini yig‘ish va maktab foyesi va sinf xonalarini sun’iy archa va elektr chiroqlar bilan bezatish ham qat’iy taqiqlangan.
Maxsus komissiya fuqarolarga yangi 2021-yil bayrami tadbirlarini oila davrasida o‘tkazishni tavsiya etgan. Hududiy vakolatli organlarga esa viloyatlar, tumanlar markazlari va shaharlarda ochiq osmon ostida archalar o‘rnatish tavsiya etilgan.
Izoh (0)