Zulfira No‘monova, “Daryo” yosh jurnalistlar maktabi tinglovchisi
Joriy yilning 18-dekabr kuni UzAuto Motors aksiyadorlik jamiyati va Monopoliyaga qarshi kurashish qo‘mitasi masalasi bo‘yicha sud majlisi bo‘lib o‘tdi. Sudda qo‘mitaning shikoyati qanoatlantirilmadi.
UzAutoMotors va qo‘mita o‘rtasidagi sud jarayonlari barchani birdek qiziqtirib, doimiy muhokama markazida bo‘lib kelmoqda.
Jarayon nimadan boshlangan edi?
19-avgust qo‘mitaning maxsus komissiyasi UzAuto Motors’da o‘tkazilgan tekshiruv natijasida kompaniya mashina narxini asossiz oshirgan deb topgandi. UzAuto Motors bu qarorga “Monopoliyaga qarshi kurashish qo‘mitasi tomonidan ish bir taraflama ko‘rib chiqildi, uning yakunida noto‘liq ma’lumotlarga asoslangan qaror qabul qilindi”, deb munosabat bildirib, qaror ustidan sudga shikoyat qildi.Dastlabki sud
Toshkent shahar ma’muriy sudining 30-oktabrdagi hal qiluvchi qaroriga ko‘ra, qo‘mita maxsus komissiyasi qarori haqiqiy emas deb topildi va sudda UzAuto Motors yutib chiqdi.Muammoga munosabat
Jarayonga blogerlar, deputatlar va xalq o‘z munosabatini bildirdi. Jumladan, bloger Xushnudbek Xudoyberdiyev suddan avval sud jarayonlaridan ko‘p narsa kutmayotganini va bu ish bizni muammolardan qutqarmasligini, bu kasalni tuzatish uchun emas, shunchaki vaqtincha og‘riq qoldirishini aytdi.Oliy Majlis Qonunchilik palatasi deputati Doniyor G‘aniyev esa o‘z Telegram-kanalida “UzAuto Motors’ga oid bugungi sud qarori mamlakatda monopoliyaga qarshi kurash, sog‘lom raqobat muhitni yaratish borasida aytilayotgan barcha gaplar, kutilayotgan islohotlar ildiziga bolta urdi”, deb yozib qoldirdi.
Ijtimoiy tarmoqlar foydalanuvchilari mavzuni keng muhokama qildi.
UzAuto Motors bo‘yicha “maxfiy” ma’lumot
UzAuto Motors va “Jizzax avtomobil zavodi” MChJ import qilayotgan avtomobillar uchun import boji va utilizatsiya yig‘imi to‘lanishi bo‘yicha Oliy Majlisning bir guruh deputatlari Davlat bojxona qo‘mitasi va Moliya vazirligiga 23-oktabr kuni deputatlik so‘rovi kiritdi. Ular bojxonachilardan to‘lovlar haqidagi ma’lumot “maxfiy” ekani mazmunidagi javobni 6-noyabrda qabul qildi.Navbatdagi sud. UzAuto Motors bu safar ham g‘olib
18-dekabr kuni Toshkent shahar ma’muriy sudida javobgar keltirgan appelyatsiya shikoyati bo‘yicha sud bo‘lib o‘tdi. Sud qaroriga asosan “birinchi instansiya sudining 30-oktabrdagi hal qiluv qarori va xususiy ajrimi o‘zgarishsiz, keltirilgan appelyatsiya shikoyati qanoatlantirilmasdan qoldirildi ”, deya xabar berdi Oliy sudi matbuot xizmati.Keyingi tafsilotlar
Sud natijasiga jamoatchilik keskin munosabat bildirdi. Oliy Majlis deputati Rasul Kusherboyev Facebook-sahifasida “Antimonopoliya va UzAuto Motors sudi bugun tugadi, menimcha. Muammo esa qoldi. Biroq bu muammoning tugashimi, yo boshlanishi, buni vaqt ko‘rsatadi”, deb izoh qoldirdi.“Milliy tiklanish” demokrati partiyasi markaziy kengashi raisi Alisher Qodirov Telegram’dagi shaxsiy kanalida partiya sud jarayoni yakunlanishi bilan Monopoliya qo‘mitasi O‘zbekiston iqtisodiyoti va UzAuto Motors kompaniyasining xalqaro reputatsiyasiga qancha zarar yetkazganini hisoblash bo‘yicha eshituv tashkil qilishini bildirdi.
Hozircha ish shu nuqtaga kelib qoldi. Rasul Kusherboyevning jarayon tugagani haqidagi xulosasi to‘g‘rimi yoki u hali davom etadimi? Kuzatishda davom etamiz.
Izoh (0)