Namanganda 2021-yili turizm bilan bog‘liq 10 dan ortiq festivallar o‘tkazilishi ko‘zda tutilmoqda. Bu haqda viloyat hokimi Shavkatjon Abdurazzaqov viloyat aholisiga murojaatida ma’lum qildi, deya xabar berdi “Daryo” muxbiri Azizbek Abduvaliyev.
Jumladan, Namangan shahrida may oyida 60-yubiley “Gullar festivali”, Davlatobod tumanidagi “Afsonalar vodiysi” bog‘ida Taste of Uzbekistan gastronomik festivali, Chust tumanida esa “Osh festivali” o‘tkazilishi rejalashtirilgan. Bu tadbirlarning barchasi pandemiya bilan bog‘liq vaziyatdan kelib chiqib amalga oshiriladi.
Shavkatjon Abdurazzaqovga ko‘ra, Namangan viloyatining turizm salohiyatini oshirish, sohada yangi loyihalar amalga oshirilishini ta’minlash maqsadida 2021—2023-yillar uchun mo‘ljallangan dastur ishlab chiqilgan. Mazkur dasturga 167 ta loyiha kiritilib, turizm sohasida xizmatlar hajmi va sifatini oshirish, yalpi hududiy mahsulotda turizmning ulushini ko‘paytirish ko‘zlangan.
Shuningdek, viloyatda 4 ta turistik mahalla tashkil etish konsepsiyasi ishlab chiqildi. Pop tumanidagi Chodak, Chust tumanidagi G‘ova, Yangiqo‘rg‘on tumanidagi Nanay va Kosonsoy tumanidagi “Olmazor” mahallalarida shunday hududlar ish boshlaydi. Mazkur mahallalarda 100 dan ortiq oilaviy mehmon uylari, dam olish obyektlari, milliy hunarmandchilik mahsulotlari savdosi, milliy urf-odatlar bilan tanishtirish xizmatlari yo‘lga qo‘yiladi.
Viloyatda homiylik va budjet mablag‘lari hisobidan Namangan shahridagi “O‘n bir Ahmad” ziyoratgohi, “Qodirxo‘ja eshon uyi”, Uychi tumanidagi “Devona buva”, Chust tumanidagi Buonamozor, “Ayritom bobo hamda Namangan tumanidagi “Xilvatxona” ziyoratgohlarida restavratsiya ishlari amalga oshirilishi rejalashtirilgan.
Izoh (0)